Европа Иттифоқида 28 майдан бошлаб янги 100 ва 200 евролик купюралар муомалага чиқарилди. «Корреспондент.net»нинг хабар беришича, бу ҳақда Европа Марказий банки маълум қилган.
Янгиланган банкноталар эски рангларини сақлаб қолган, лекин дизайн жиҳатдан бироз ўзгарган. Улар, шунингдек, бўйи қисқарган, эни эса 50 евролик купюраники каби. Қайд этилишича, бу янги купюраларга фуқаролар ҳамёнига бемалол сиғишига ёрдам беради, банкоматларда эса тезроқ ишланади.
Янгиланган 100 ва 200 евролик купюралар қўшимча ҳимоя элементи билан таъминланган. Уларга фақат машина аниқлаши мумкин бўлган кўз илғамайдиган ҳимоя белгилари қўйилган. Бундан ташқари, унда янги элемент — купюра ўгирилганда ўзгарадиган голограмма ҳам бор.
Бундан аввал 5, 10, 20 ва 50 евролик купюралар янгиланиб, муомалага чиқарилган эди. Эски банкноталардан ҳам муомаладан табиий чиқиб кетгунига қадар фойдаланилади. Янгиланган 500 евролик купюра чиқарилмайди, 2018 йилнинг охирида эски версиясини босиб чиқариш ҳам тўхтатилган эди. Бу террорчилик ва ноқонуний меҳнат фаолиятини молиялашни қийинлаштириш мақсадида қилинган.
Изоҳ (0)