Бразилиянинг Манаус шаҳри ҳудудида жойлашган тўртта қамоқхонада 40 дан ортиқ маҳбуслар ўлик ҳолда топилди, деб хабар берди «ТАСС».
Жасадларнинг барчасида бўғиш аломатлари қайд этилган. Маҳбусларнинг ўлими юзасидан бирор бир аниқ тафсилотлар келтирилмаган. Бразилия расмийларининг сўзларига кўра, ҳозирда тўрттала қамоқхонадаги вазият назоратга олинган.
Манаусдаги қамоқхоналардан бирида 26 май куни содир бўлган тартибсизликлар оқибатида 15 нафар маҳбус ҳалок бўлган эди. Қамоқхона ходимлари тартибни тиклашга муваффақ бўлган, турмадан қочиш ҳолатлари қайд этилмаган.
Худди шу қамоқхонада 2017 йилнинг январида ҳам ғалаён кўтарилган. Оқибатда маҳбусларнинг 56 нафари ҳалок бўлган, қарийб 130 нафари қочиб кетган. Унда тартибсизликлар 17 соат давом этган.
Ҳозирда Бразилия қамоқхоналарида 730 мингдан ортиқ маҳбуслар жазони ўтаётган бўлиб, бу уларга ажратилган жойдан 50 фоиз кўп. Маҳбусларнинг қониқарсиз шароитда сақланаётгани кўпинча тартибсизликлар келиб чиқишига олиб келган.
Изоҳ (0)