Наманган вилоятида 2018 йил давомида темир йўл изларида 3 маротаба бахтсиз ҳодиса содир бўлиб, бунинг оқибатида 5 нафар фуқаро ҳаётдан кўз юмди. Бу ҳақда «Дарё»га вилоят ИИБ Транспортда хавфсизликни таъминлаш бошқармаси маълум қилди.
Жорий йил 5 ойи давомида темир йўл кесишмасидан ўтиш қоидаларига риоя қилинмагани туфайли 1 та ЙТҲ содир этилиб, тўқнашувда бир нафар фуқаро енгил яраланди.
Бундай ҳодисаларни барвақт олдини олиш мақсадида бошқарма ходимлари томонидан ҳафтанинг ҳар чоршанба куни «Темир йўлларда хавфсиз кун» профилактик тадбири ўтказилиб келинмоқда. Уларда темир йўл иншоотларида хавфсизликни таъминлаш, жиноят ва ҳуқуқбузарликларни олдини олиш, ўзбошимчалик билан яратилган пиёдалар ўтиш жойлари ҳамда ноқонуний қурилма, савдо шохобчалари, темир йўл атрофига ташлаб кетилган маиший чиқиндиларни бартараф этишга асосий эътибор қаратилмоқда.
Вилоят кесимида темир йўл атрофига яқин жойлашган хонадонларда яшовчи фуқаролар, таълим муассасалари ходимлари ва ўқувчилари билан профилактик суҳбатлар ўтказилди.
Ташкил этилган ишчи гуруҳлари томонидан темир йўл кесишмаларида ҳамкорликда текширувлар ўтказилди. Текширувлар давомида, жумладан, Тўрақўрғон—Роустон темир йўл бекатлари оралиғида жойлашган қўриқланадиган темир йўл кесишмаларида баннер йўқлиги аниқланиб, келгусида уни ўрнатиш юзасидан мутасаддиларга таклиф киритилди.
Тадбирлар давомида шубҳа уйғотганлиги учун 12 киши шахсини аниқлаш учун жойлардаги навбатчилик қисмларига келтирилди. Ҳуқуқбузарликлар содир этган 13 нафар шахсга нисбатан маъмурий баённомалар расмийлаштирилди.
Изоҳ (0)