24–25 май кунлари Ўзбекистон Ички ишлар вазирининг ўринбосари, полковник Муҳиддин Жўраевнинг навбатдаги оммавий сайёр қабули Самарқанд вилоятининг Пастдарғом ва Нуробод туманларида бўлиб ўтди.
Самарқанд вилоят ИИБ матбуот хизматининг «Дарё»га маълум қилишича, Пастдарғом туманидаги 32-сонли мусиқа ва санъат мактабида бўлиб ўтган сайёр қабул жараёнида китоб ярмаркаси ўтказилган. Қабулда Пастдарғом туман ҳокимлиги ва туман тиббиёт бирлашмаси раҳбарияти ногиронлар учун аравачалар тарқатди. Йил бошидан буён 76 та ногиронга бу каби аравачалар берилган. Муборак Рамазон ойи муносабати билан ҳам яна бир гуруҳ имконияти чекланган шахсларга ногиронлик аравачаси топширилди.
Сайёр қабулга келган мурожаатларнинг аксарияти уй-жой таъминоти, ер эгалиги, кредит масаласи, тадбиркорлик фаолияти, моддий ёрдамлар борасида бўлди. Пастдарғом туманидаги сайёр қабулда умумий тарзда 42 та мурожаат қабул қилинди. Айримлари жойида ҳал қилинган бўлса, қолганлари мутасадди ташкилотларга кечиктирмасдан ҳал қилиш учун йўлланди.
25 май куни Нуробод туманининг 18-сонли мусиқа мактабида ўтказилган сайёр қабулга 33 та муаммо кўриб чиқилди. 7 та масала жойида ижобий ҳал этилиб, битта масалага ҳуқуқий тушунтириш берилди. Қолган 25 та мурожаат юзасидан тегишли муддатлар берилиб, уларнинг ижроси назоратга олинди.
Шунингдек, сайёр қабулларда иштирок этган вилоят ИИБ бошлиғи ва туманлар ИИБлари бошлиқлари томонидан ҳам фуқаролар қабул қилинди. Улар томонидан ҳам тадбир иштирокчиларига тегишли маслаҳат ва тавсиялар берилди.
Изоҳ (0)