Самарақанд вилояти ҳокими ўринбосари Рустам Қобилов Иштихон туманида юз берган бир оиланинг беш аъзоси ўлдирилиши каби каби жиноятлар вилоятда қайта содир этилмаслигига ваъда берди. У бу ҳақда 24 май куни бўлиб ўтган Ёшлар пресс клубининг навбатдаги сессиясида айтиб ўтди.
15 май куни Самарқанднинг Қўшработ туманидаги «Боқичиғатой» маҳалласи ҳудудидаги фермер хўжалигида қолдириб кетилган Damas’нинг ичидан Иштихон тумани Чимқўрғон қишлоғида яшаган бир оиланинг беш нафар аъзоси жасадлари топилган эди. Уч кун тун-у кун олиб борилган ҳаракатлар натижасида ушбу қотилликни содир этишда гумонланиб, тўрт киши — Иштихон тумани Чимқўрғон қишлоғида яшовчи, 1981 йилда туғилган Т.Ғ., 1995 йилда туғилган Э.Ш., 1993 йилда туғилган У.Ж. ва Қўшработ туманида яшовчи, 1996 йилда туғилган Н.Х. ушланди.
Мавзуга доир: Самарқандда бир оиланинг беш аъзосини ўлдиришда гумон қилинаётганларнинг бари — ўзаро қариндош, оилалари намунали ва ўзига тўқ
Ёшлар пресс-клубида чиқиш қилган Самарқанд вилояти ҳокими ўринбосари Рустам Қобилов ушбу қотиллик жиноятига тўхталар экан, жумладан, шундай деди: «Самарқандда бу каби жиноятлар такрорланмаслигига ваъда бераман. Кўзимиз шундай очилдики, пешонамиз деворга шундай урилдики, келгусида бундай жиноятлар содир бўлишига йўл қўймаслигимиз керак — бунга ҳаққимиз йўқ».
Унинг таъкидлашича, жиноятчиликка қарши курашиш бўйича барча ҳудудлар учун универсал усулни яратиб бўлмайди. Масалан, Иштихон туманида жиноятчиликни олдини олишга қаратилган ҳаракатлар Булунғур ёки Ургут туманига тўғри келмаслиги мумкин.
«Биз ҳудуднинг менталитети, жойлашуви ва аҳолисининг ўзига хослигини ҳисобга олишимиз керак. Шунга амин бўлдимки, кейинги фаолиятимизда фақат форма кийиб юрадиган ходимларнинггина эмас, фаол ёшларимизнинг ҳам ёрдамига суянишимиз лозим», — дея қўшимча қилди вилоят ҳокими ўринбосари.
Самарқанд вилояти маҳаллалар кенгаши раисининг ёшлар масалалари бўйича ўринбосари Санжар Турдиев жиноят ёки ҳуқуқбузарлик содир этилмаслиги учун ходимлар, қолаверса, комиссия аъзолари билан кеча-ю кундуз меҳнат фаолиятини давом эттиришларини таъкидлади.
Сессияда маълум қилинишича, Иштихон туманида ишсиз ёшлар сони 3 520 нафарни ташкил этади. Шунингдек, 341 нафар ёшлар ўқиш ва ишлаш мақсадида хорижга чиқиб кетган.
Изоҳ (0)