Davomi: Bosh prokuratura Samarqandda bir oilaning besh a’zosi o‘ldirilishi hodisasi yuzasidan axborot berdi
Samarqand viloyati Ishtixon tumani Chimqo‘rg‘on mahallasida yashovchi oilaning 5 nafar a’zosi — er-xotin, ikki o‘g‘il va bir qizni vahshiylarcha o‘ldirib, Qo‘shrabot tumani Boqi qishlog‘ida Damas avtomashinasi ichiga tashlab ketishgan. Bu haqda “Daryo” muxbiri Farhod Norbo‘tayev xabar bermoqda.
15-may kuni mashina ichidagi jasadlarni ko‘rib qolgan fuqarolar bu haqda zudlik bilan ichki ishlar organlariga murojaat qilgan. Marhumlarning boshiga og‘ir metal bilan urib o‘ldirib, odamlar serqatnov bo‘lmaydigan joyga tashlab ketishgan.
Ushbu oilani taniydigan “Daryo” manbalari marhum er-xotinning yana bir farzandi borligini ma’lum qildi.
Jinoyat kim tomonidan va qachon sodir etilganligi noma’lum. Hozirda jinoyatchini topish uchun qidiruv ishlari olib borilmoqda.
