Ўзбекистонда болаларни мактабгача таълим билан қамраб олишда Хитой тажрибасидан фойдаланилади

Ўзбекистонда мактабгача таълимга болаларни қамраб олиш ҳамда педагог-ўқитувчилар малакасини ошириш бўйича Хитой тажрибаси қўлланилади. Бу ҳақда Тошкентда 24 май куни ўтказилган Ўзбекистон—Хитой форумида Мактабгача таълим вазири ўринбосари Мақсуджон Йўлдошев маълум қилди.

Унинг айтишича, 1,5 миллиарддан ортиқ аҳолиси бор мамлакатда болаларнинг 80 фоизи мактабгача таълим муассасалари билан қамраб олинган ва бу — жуда катта ютуқ. «Бизда эса бу кўрсаткич 38 фоизни ташкил этади. Ўзбекистонда болаларни мактабгача таълим билан қамраб олиш даражасини кескин ошириш бўйича Хитой тажрибаси оммалаштирилади. Қамровни кенгайтириш билан бирга педагог-ўқитувчиларнинг малакасини ошириш бўйича ҳам келишиб олинди», — деди Йўлдошев.

Форумда Хитойнинг таълим ва маданият марказларини ўзида бирлаштириб, халқаро миқёсда гуманитар фаолият олиб борувчи «Сун Синлин жамғармаси» вакиллари ҳам қатнашди. Жамғарма раиси Сун Синлиннинг айтишича, барча тадбирлар «Энг яхши нарсалар болалар учун» шиори остида амалга оширилади. Хитойлик ишбилармонлар интеллектуал ривожлантирувчи ўйинчоқлар ва ўйин ускуналари, шунингдек, экологик тоза ёғочдан ўйинчоқлар ишлаб чиқариш бўйича ўзбекистонлик ҳамкасблари билан музокаралар ўтказган.

Йўлдошевнинг қўшимча қилишича, Хитойда болаларни ижтимоий-ҳиссий ривожланиши учун ўйинчоқлар маҳаллий тадбиркорлар томонидан ишлаб чиқарилади. «Улар ўйинчоқ ишлаб чиқариш жараёнига ўз миллий қадриятлари ва маданиятидан келиб чиққан ҳолда ёндашади. Хитойлик ҳамкорлар билан Ўзбекистонда ўйинчоқ ишлаб чиқаришни йўлга қўйишдан асосий мақсад — миллийлигимизни ўйинчоқларда акс эттириш ва уларнинг сифатини оширишдир», — деди у.

Мактабгача таълим вазирлиги қошидаги Ахборот ва педагогик технологиялар инновацион маркази ва Хитойнинг таълимни ривожлантириш ва дастурий таъминот ишлаб чиқариш билан шуғулланувчи корхоналари ўртасида ўзаро англашув меморандумлари имзоланди. Шунингдек, мактабгача таълим соҳаси мутахассисларининг малакасини Хитойда ошириш, стипендиялар дастури ва илмий унвонларни жорий этиш йўналишида ҳам ҳамкорликни йўлга қўйиш муҳокама қилинган.