Бухоро шаҳрининг Раззоқ Ҳамроев кўчасида яшовчи Р.Н. 2018 март ойида уйининг томорқаси 1×1 квадрат метр майдонига, маккажўхори орасига икки туп каннабис (наша) ўсимлигини қонунга хилоф равишда экиб, ўсимликларни 2018 йил октябрь ойига қадар парваришлаб етиштириб олган.
Р.Н. каннабис баргларини қуритиб, майдалаб, марихуана тайёрлаб, уни Бухоронинг Жўйбор кўчасидаги озиқ-овқат дўкони олдида сотмоқчи бўлган. 2018 йил 29 ноябрь куни Бухоро вилояти ИИБ ЖҚБ тезкор ходимлари томонидан юборилган «махсус харидор»га 9,23 грамм марихуанани 800 минг сўмга сотаётган вақтида ушланган.
Шу куни унинг уйидан уч дона гугурт қутичаси, газета бўлаклари ўрами ва икки дона полимер пакетларга алоҳида-алоҳида ўраб жойлаштирилган, умумий оғирлиги 112,29 грамм бўлган марихуана топилган. Ушбу ҳолат бўйича жиноят ишлари бўйича Шофиркон туман судида суд мажлиси бўлиб ўтган.
«Газета.uz»нинг ёзишича, «ёши бир жойга бориб қолса-да, жиноят йўлига кирган» Р.Н. Жиноят кодексининг 270-моддаси 1-қисми (тақиқланган экинларни етиштириш) ва 273-моддаси 5-қисми (гиёвандлик воситаларини кўп миқдорда қонунга хилоф равишда сотиш) билан айбдор деб топилиб, 3 йил 6 ойга озодликдан маҳрум қилинган.
Изоҳ (0)