Давлат хавфсизлик хизмати ходимлари ва Чегара қўшинлари ҳарбий хизматчилари томонидан ўтказилган тезкор тадбир давомида Сурхондарё вилояти ҳудудига ноқонуний ўтган фуқаролар қўлга олинди, деб хабар беради ЎзА.
Афғонистон фуқаролари — 1984 йилда туғилган Оқмурод Қурбон ўғли ва 1997 йилда туғилган Абдулманнон Муҳаммадназар Амударё орқали ноқонуний ўтган.
Текширув давомида аниқланишича, улар 35,345 килограмм опий, 5,21 килограмм гашиш ҳамда 4,51 килограмм героин — жами 44,417 килограмм миқдордаги гиёҳванд моддани Ўзбекистон ҳудудига олиб кирмоқчи бўлган.
Ҳозирда мазкур ҳолат юзасидан ДХХ Сурхондарё вилояти бошқармаси томонидан Жиноят кодексининг 223, 273 ва 246-моддаларига мувофиқ жиноят иши қўзғатилиб, тергов ҳаракатлари олиб борилмоқда.
Бундан ташқари, ДХХ Фарғона вилояти бошқармаси ходимлари томонидан ўтказилган тезкор тадбир давомида эса Қўқон шаҳрида истиқомат қилувчи 45 ёшли Исроил Ғаниэв Наманган шаҳрида яшовчи 46 ёшли Баҳодир Низомбоэвдан 2,162 килограмм бўлган опий гиёҳванд моддасини сотиб олаётган вақтда ушланган.
Аниқланишича, Баҳодир Низомбоэв мазкур гиёҳванд моддани Қирғизистондаги «Женис» исмли таниши орқали контрабанда йўли билан Ўзбекистон ҳудудига олиб ўтган.
Ҳозирда мазкур ҳолат юзасидан Давлат хавфсизлик хизмати Фарғона вилояти бошқармаси томонидан Жиноят кодексининг тегишли моддаларига асосан жиноят иши қўзғатилиб, тергов ҳаракатлари олиб борилмоқда.
Изоҳ (0)