Наманган вилоятининг Чуст туманидаги фермер хўжалиги еридан «ўта шифобахш» сув чиққани ҳақида телевидение орқали намойиш этилган ахборот лавҳаси, айрим ижтимоий тармоқларда тарқатилган хабарлар омма ўртасида катта қизиқиш ва шов-шувга сабаб бўлди.
Ўзбекистон Республикаси Соғлиқни сақлаш вазирлиги ушбу хабарлар юзасидан «Дарё»га маъумот берди.
Таъкидланишича, Наманган вилоят ДСЭНМ мутахассислари томонидан 2019 йилнинг 22 май куни Чуст туманидаги «Томчи замин» фермер хўжалигидаги артезиан қудуқ сувидан лаборатория текширувлари учун сув намуналари олинган. Вилоят Давлат санитария эпидемиология марказининг аккредитациядан ўтган лабораторияларида бактериологик, санитария-кимёвий ва радиологик текширувлар олиб борилмоқда. Дастлабки санитария-кимёвий таҳлил натижаларига кўра олинган сув намунаси лойқалиги, водород кўрсаткичи (pH), умумий минералланиши (қуруқ қолдиқ), умумий қаттиқлиги, сулфатлар ва хлоридлар қолдиғи кўрсаткичлари бўйича ЎзДст 950-2011 «Ичимлик суви. Гигиеник талаблар ва сифатини назорат қилиш» Давлат стандарти меъёрларидан бир неча баробар юқорилиги аниқланган.
Қайд этилишича, бундай сув аҳоли учун ичимлик суви сифатида истеъмолга берилиши ва ишлатилиши мумкин эмас. Ҳозирда бактериологик таҳлиллар давом эттирилмоқда.
«Ҳар қандай минерал сувларнинг шифобахшлик хусусиятини аниқлаш учун аввало Ўзбекистон Республикаси Геология ва минерал ресурслар Давлат қўмитаси томонидан тегишли таҳлиллар ўтказилиши ва ушбу таҳлил натижалари Соғлиқни сақлаш вазирлигининг Республика терапия ва тиббий реабилитация илмий-амалий маркази томонидан баҳоланиши лозим. Агарда ўрганилган сувнинг шифобахшлиги аниқланса, сувдан фойдаланиш қоидаларига мос равишда сув манбасида белгиланган қурилиш ишлари олиб борилиб, сувнинг айнан қайси касалликларга шифолиги бўйича санитария-гигиена ва эпидемияга қарши тартибларга риоя этган ҳолда фойдаланиш мумкин. Мутахассислар томонидан ўрганилмасдан, сувни ичиш, ювиниш, ванна ёки бошқа усуллар билан даво сифатида фойдаланиш организмда мавжуд касалликларни қўзғатиши, оғирлаштириши ёки бошқа касалликларни келтириб чиқариши каби салбий оқибатларга олиб келиши мумкин.
Шундай экан, ушбу ҳолатда «Томчи замин» фермер хўжалигидаги артезиан қудуқ сувидан инсон саломатлиги йўлида фойдаланишни тўхтатиш лозим.
Сув – нафақат ҳаёт манбаи, балки кўпгина юқумли, жумладан ўта хавфли юқумли касалликлар ҳамда соматик касалликларнинг тарқалиш омили эканлигини ёдимиздан чиқармаслигимиз керак», — деди Республика Давлат санитария-эпидемиология назорати маркази раҳбари Баҳром Алматов.
Изоҳ (0)