Наманган муҳандислик-технология институти ректори Одилжон Маматкаримов бошчилигидаги институт делегацияси нуфузли олий таълим муассасалари билан алоқа ўрнатиш, ҳамкорликда илмий тадқиқот ишларини амалга ошириш ҳамда малакали магистр ва PhD докторантлар тайёрлаш мақсадида Хитойда бўлиб қайтди. Бу ҳақда «Дарё»га институт матбуот хизмати маълум қилди.
Сафар давомида Ханжоудаги Зейжианг фан ва технологиялар университети, Шанхайдаги Дунхуа университети ҳамда Хефеи шаҳридаги Хитой фан ва технологиялар университети раҳбарлари билан учрашувлар ўтказилиб, улар билан тегишли меморандумлар имзоланди.
Музокаралар давомида Хитой олий таълим муассасаларида мақсадли докторант (PhD) ва магистрлар тайёрлаш, профессор-ўқитувчилар малака оширишини йўлга қўйиш, қўшма илмий тадқиқот ва лойиҳаларни амалга ошириш, конференция ва ворк-шоп тадбирларида иштирок этиш, талабалар ва ёш ўқитувчилар учун ёзги мактаблар ташкил этиш бўйича келишувларга эришилди.
Институтнинг 10 нафар профессор-ўқитувчиси ва талабаси жорий йил сентябрь ойида Хитойда бўлиб ўтадиган халқаро конференция ҳамда ворк-шоп тадбирида иштирок этадиган бўлди.
Делегация Хитойдаги етакчи олий ўқув юртларининг илмий ва ўқув лабораториялари билан танишиб, уларда дарс жараёнлари ташкил этилишини яқиндан ўрганди. Шунингдек, Хефеи шаҳридаги олий таълим муассасаларида таҳсил олаётган ўзбекистонлик ёшлар билан учрашув ўтказилди.
Изоҳ (0)