Ўзбекистон Республикаси Бош вазирининг ижтимоий масалалар бўйича ўринбосари Азиз Абдуҳакимов ЮНЕСКОнинг 2009—2017 йиллардаги Бош директори Ирина Бокова билан учрашди. Бу ҳақда Азиз Абдуҳакимовнинг Facebook’даги саҳифасида маълум қилинди.
Ирина Бокова 2013 йилда «Шарқ тароналари» IX халқаро мусиқа фестивалида иштирок этиш учун Ўзбекистонда бўлгани ва ўша даврдан бошлаб катта ижобий таассуротлар қолганлигини айтиб ўтди.
Шу билан бирга ҳозирги кунда Ўзбекистондаги улкан ижобий ўзгаришлар яққол намоён бўлаётганини мамнуният билан баён қилди.
У Ўзбекистоннинг жаҳон ҳамжамияти билан очиқ ва амалий иш олиб бораётгани, қўшни давлатлар билан долзарб масалаларни ҳал этиб, улар билан яқин ҳамкорликни йўлга қўйгани, инсон ҳуқуқларини таъминлаш каби изчил ислоҳотлар халқаро майдонда эътироф этилаётганини алоҳида таъкидлади.
Учрашув давомида, ЮНЕСКО собиқ Бош директорининг тажрибасини инобатга олиб, Ўзбекистоннинг халқаро ташкилотлар билан мулоқотини самарали йўлга қўйиш, мамлакат имижини ошириш бўйича фикр алмашилди.Ирина Бокова Ўзбекистон маданий мероси ва тарихий шаҳарларини асраш борасида сўнгги йилларда ижобий ўзгаришлар кузатилаётгани, шунингдек, ЮНЕСКО экспертлари билан яқин ҳамкорликни давом эттириш ва бу йўлда халқаро даражада нуфузли мукофот таъсис этиш, муҳим масалалар бўйича халқаро анжуманлар ташкил этиш каби таклифларни билдирди.
Ушрашувда жаҳонннинг нуфузли олий таълим муассасаларида Ўзбекистон ва ундаги янгиланишлар ҳақида маърузалар ташкил этиш ва жаҳон медиа майдонида Ўзбекистоннинг ижобий имижини шакллантиришга йўналтирилган ахборотларни кўпайтиришга доир янги имкониятлар кўриб чиқилди.
Изоҳ (0)