Ўзбекистоннинг қайси ҳудудларида ишсизлик даражаси энг юқори эканлиги маълум қилинди

22 май Ўзбекистон Республикаси Бандлик ва меҳнат муносабатлари вазири Шерзод Кудбиев Ўзбекистонда аҳоли бандлигини таъминлаш ва янги иш ўринларини ташкил этиш бўйича 2019 йилнинг биринчи чорагида амалга оширилган ишлар юзасидан Ўзбекистон Республикаси Олий Мажлиси Қонунчилик палатаси Меҳнат ва ижтимоий масалалар қўмитаси кенгайтирилган йиғилишида ҳисобот берди. Бу ҳақда вазирлик матбуот хизмати хабар берди.

Ҳисобот доирасида Ўзбекистон меҳнат бозорининг ҳолати, ишга жойлаштириш, янги иш ўринларини ташкил этиш бўйича илк бор жорий қилинган давлат буюртмаси механизми, меҳнат миграцияси, касбга ўқитиш ва тайёрлаш, меҳнат бозоридаги фаол сиёсатни молиялаштириш ва хусусий бандлик агентликлари фаолиятига доир сўнгги уч-тўрт ойда амалга оширилган ишлар таҳлилий-танқидий ёритилди.

Шунингдек, тизимдаги мавжуд муаммолар ва уларни ҳал этиш борасида олиб борилаётган чора-тадбирлар ҳақида ҳам алоҳида тўхталиб ўтди. Хусусан, норасмий бандлик тизимини тартибга солиш механизмини шакллантириш, яширин иш ўринларини қонунийлаштириш, меҳнат миграцияси тизимини янада такомиллаштириш, касбий малакани баҳолаш миллий тизимини жорий қилиш сингари долзарб масалаларга урғу берилди.

Ҳозирги кунда меҳнатга лаёқатли аҳоли сони – 18 954 минг (ўсиш - 1,0%), банд аҳоли сони – 13 376 минг (ўсиш - 1,3%) нафарни ташкил этади. Расмий секторда бандлар – 5 403 минг кишини ташкил этиб (ўсиш - 3,4%), расмий бандликнинг умумий бандликдаги улуши 40,5%ни ташкил этмоқда. Иқтисодиётнинг норасмий секторида бандлар – 7 964 минг (59,5%), шу жумладан, хорижда ишлаётганлар – 2 365,4 мингни ташкил этади.

Жорий йил биринчи чоракда ишсизлик даражаси 9,4 фоизни ташкил этди (ўтган йил шу даврда - 9,7%), 30 ёшгача бўлган ёшлар орасида - 15,3 фоиз, аёллар орасида – 13 фоиз. Энг юқори ишсизлик Қорақалпоғистон Республикаси, Андижон, Қашқадарё, Самарқанд, Сирдарё ва Фарғона вилоятларида (9,7%) қайд этилган. Ишга муҳтож аҳоли сони – 1 миллион 391 минг киши.

Ҳисобот давомида меҳнат соҳаси истиқболи бўйича вазирлик томонидан олиб борилаётган ишлар ҳам қайд этилди. Жумладан, вазирлик томонидан идоралараро меҳнатга лаёқатли фуқароларнинг бандлиги ва меҳнат фаолиятининг «шахсий тарихи»ни акс эттирувчи «Ягона миллий меҳнат тизими» дастури ишлаб чиқилмоқда. Мазкур дастур иш билан банд ҳар бир фуқаро ва ҳар бир иш ўрнининг ҳисобини юритиш, электрон меҳнат дафтарчаси ва электрон меҳнат шартномаларини юритиш имконини беради.

Ҳисобот якуни бўйича йиғилишда меҳнат соҳасини янада такомиллаштириш юзасидан тегишли таклиф ва мулоҳазалар билдирилди.