Ички ишлар вазири ўринбосари, полковник Рустам Ҳотамовнинг 21 май куни Қашқадарё вилояти, Касби туманида бўлиб ўтган сайёр қабулида тилга олинган 74 та шикоятнинг 26 таси Ички ишлар тизимидаги муаммолар эканлиги аниқланган. Бу ҳақда «Дарё»га вилоят ИИБ матбуот хизмати маълум қилмоқда.
Матбуот хизмати хабарига кўра, сайёр қабулда Қарши шаҳри ва 6 та тумандан келган мурожаатчилар муаммоси тингланган. Қабулда вазир ўринбосари мурожаатчиларнинг 74 та муаммосини эшитган ва 17 та муаммога ўша жойнинг ўзида ечим топилган.
Касби тумани «Фазли» МФЙ, «Фазли» қишлоғида яшовчи I-гуруҳ ногирони Дилдора Абдиева ҳамда «Жаркўча» МФЙ да яшовчи I-гуруҳ ногирони Ўлмас Бекназаровнинг ногиронлик аравачаси сўраб қилган мурожаатига жавобан ўша жойнинг ўзида уларга ногиронлик аравачаси топширилган бўлса, мурожаатчилар Юлдуз Қўзиева, Тошпўлат Бобоев, Жаббор Ашурмаматовларга бир жуфтдан қўлтиқтаёқ совға қилинган.
ИИБ матбуот хизматининг қўшимча қилишича, Ички ишлар тизимидаги муаммолар ҳақида сўз очган 26 нафар мурожаатчининг 4 нафари хизматга қайта тиклаш ва ишга кириш масаласида мурожаат қилган бўлса, 4 нафар мурожаатчи суриштирув ва тергов ҳаракатларидан норозилигини билдирган. 2 нафар мурожаатчи эса ЙПХ ходимларининг хатти-ҳаракатидан норози бўлиб шикоят қилган.
Аниқланишича, ИИБ тизимидаги 26 та муаммонинг 7 таси жойида ҳал этилган бўлса, қолган 19 таси ижрога қаратилган.
Маълумотга кўра, вазир ўринбосарининг сайёр қабули бугун Яккабоғ туманида давом этмоқда. Қабулда Шаҳрисабз шаҳри, Қамаши, Чироқчи, Яккабоғ, Китоб ва Шаҳрисабз туманларидан келган мурожаатчилар муаммосига ечим изланади.
Изоҳ (0)