Нью-Жерси штатининг Хадсон округидаги хлор ишлаб чиқарувчи заводда чиққан ёнғин тутуни ва кимёвий буғлар Нью-Йоркка тарқалди ва бу заҳарли бўлиши мумкин. Ҳодиса натижасида ҳукумат тўртта йўлли Пуласки Скайвей кўчасини ёпиб қўйди. Бу ҳақда Forum Daily хабар берди.
Ёнғин Олден Лидс корпорацияси заводида 17 май куни 22:00 да бошланган. Қуюқ тутунни воқеа жойидан бир неча километр узоқликдан кўриш мумкин бўлган.
Ёнғинда ёниб кетган кимёвий моддалар туфайли Нью-Жерси шимолидаги ва Нью-Йорк штатинигн бир қисмидаги расмийлар фуқароларга буғлардан ҳимояланиш учун эшикларни ва деразаларни ёпиқ сақлашни буюрган.
Айни пайтда тутун таъсирида бир қанча одам заҳарлангани ҳақидаги тасдиқланмаган хабарлар тарқалди. Нью-Йорк шаҳри расмийлари Бруклин, Манхэттен ва Стейтен-Айленд фуқароларини тутун хавфидан огоҳлантирган.
Пулакски Скайвей кўпригида жойлашган барча йўллар Жанубий Кирни ва Бродвей ўртасидаги ҳар икки йўналишда соат 22:30 да ёпилган. Ижтимоий тармоқларга жойлаштирилган фотосуратлар минтақада катта тирбандлик юзага келганини кўрсатди.
Хабарда айтилишича, 18 май куни тонгда ўт ўчирувчи ходимлар ёнғинни ўчиришга муваффақ бўлган.
Маҳаллий вақт билан соат 8:00 да ҳаво хавфсиз экани эълон қилиниб, деразаларни очишга рухсат берилган.
Изоҳ (0)