Соғлиқни сақлаш вазирлиги томонидан мамлакат бўйлаб «Ўсмирлар орасида семизликка қарши» шиори остида фаол юриш бўйича оммавий тадбирлар ташкил этилди. Бу ҳақда «Дарё»га вазирлик матбуот хизмати маълум қилди.
Жумладан, ушбу тадбир пойтахтдаги Ботаника боғида ҳам аҳоли иштирокида кўтаринки руҳда ўтказилди. Мунтазам ўтказилаётган бу каби оммавий тадбирлар аҳолида соғлом турмуш тарзига бўлган қизиқишини ошириб, уларни жисмоний фаол бўлишга ундамоқда.
Жаҳон соғлиқни сақлаш ташкилоти тахминларига кўра, 2030 йилга бориб, дунё аҳолисининг қарийб 45 фоизи семириб кетиши мумкин. Семизлик нафақат катталар, балки болалар ва ўсмирлар орасида ҳам жиддий муаммога айланиб бормоқда.
Маълумотларда келтирилишича, 1975 йилдан айни пайтга қадар дунёдаги семиз одамлар сони уч баравар ошган. 5 ёшдан 19 ёшгача бўлган 340 миллиондан ортиқ бола ва ўсмир семизликка дучор бўлган.
Болалар ва ўсмирлар орасида семизлик ва семиришнинг тарқалиши 1975 йилдаги 4 фоиздан 2016 йилда 18 фоизгача кўтарилди. Қизларнинг 18, ўғил болаларнинг 19 фоизи ортиқча вазнга эга.
Мазкур фактлар жамият учун семизлик жиддий таҳдид эканини кўрсатмоқда. Ушбу хавфнинг олдини олишда жисмоний фаоллик, жумладан, фаол юришнинг аҳамияти катта.
Изоҳ (0)