Андижон туман давлат хизматлари маркази талабга жавоб бермайдиган бинода иш юритаётган эди. Янги бунёд этилган маскан замон талабларига мос равишда қад ростлади. Бу ҳақда ДХА матбуот хизмати маълум қилди.
Бу ерда 137 турдаги давлат хизматлари кўрсатилиши режалаштирилган. Келгусида бу кўрсаткич бир неча баробар ортиши кўзда тутилмоқда.
ДХМда энг сўнгги инновациялар йўлга қўйилган. Голограмма ёрдамида марказ фаолият ҳақида тўлиқ маълумот олиш мумкин. QR — кодли «Инфоланд" кўрсатиладиган хизмат тури, унинг талаблари, пулли ёки аксинча бепул эканлигини кўрсатади.
Бу ерда нотариус хизмати йўлга қўйилган. ФХДЁ, Халқ қабулхонаси, солиқ маслахатчисидан зарур маълумотларни ҳам шу ерда олиш мумкин.
WI-FI интернет тармоғи ишламоқда. Кутубхонада 2 000 та хуқуқий ва бадиий адабиёт, 15 000 дан зиёд электрон адабиёт бор. Болалар майдончаси, тиббиёт хонаси мавжуд.
Давлат раҳбарининг «Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида»ги фармонига асосан марказда Бош вазир қабулхонаси ташкил қилинди.
Энди муаммо ва таклифлар билан келган тадбиркорлар Давлат хизматлари марказларида тегишли давлат органлари вакиллари иштирокида қабул қилинади. Мурожаатни жойида ҳал қилинишига эътибор берилади, жойида ҳал қилиш имконияти бўлмаганлари ваколатли идорага назоратга олинган ҳолда юборилади.
Ваколатли органларнинг биринчи раҳбарлари қабулхона топшириғини кўриб чиқиб, натижалари ва қабул қилинган қарорлар тўғрисида 7 кун муддатда қабулхонага ёзма равишда ахборот беради.
Изоҳ (0)