Шавкат Мирзиёев Андижон шаҳридаги Муҳаммад Юсуф номидаги мактаб-интернатга ташриф буюрди. Бу ҳақда Президент матбуот хизмати маълум қилди.
Мактаб олдида шоир бюсти ўрнатилган хиёбон барпо этилган. Билим даргоҳида умумтаълим фанлари билан бирга, она тили ва адабиётни чуқур ўрганиш учун барча шароитлар яратилган. Синфхоналар, кутубхона, спорт зали, ётоқхона замонавий жиҳозланган. Бугунги кунда бу ерда 150 нафар иқтидорли йигит-қиз таълим олмоқда.
Шавкат Мирзиёев Муҳаммад Юсуфнинг ҳаёти ва ижодига бағишланган мўъжазгина музейни кўрди. Мактаб ўқувчилари шоир шеърларидан намуналар ўқиб берди.
Давлат раҳбари мутасаддиларга мактаб-интернат ўқувчилари учун автобус ажратиш, бошқа вилоятлардаги ижод мактабларига бориб, тенгдошлари билан мулоқот қилишига кўмаклашиш, вилоят телевидениесида ўқувчилар иштирокида кўрсатувлар тайёрлаш бўйича топшириқ берди.
Изоҳ (0)