«Тожикфильм» Youtube’дан тожикистонлик видеоблогерларнинг видеоларини ўзининг рухсатисиз эълон қилмасликни сўради 

«Тожикфильм» тожик блогерлари томонидан YouTube’га жойлаштирилган видеороликлар мазмунини назорат қилишга қарор қилди, деб хабар берди «Новости.тж».

«Тожикфильм» дирексияси илтимос билан расман YouTube’га мурожаат қилди, унда ўзларининг рухсатисиз тожик видеоблогерларининг видеоларини жойлаштирмаслик сўралади.

«Тожикфильм»нинг масъул шахсларининг баёнот беришича, бу блогерлар томонидан жойлаштирилаётган айрим видеороликларнинг мазмуни жуда ҳам уятлидир. Видеоблогерлар эса, мазкур канал обуначиларига қизиқарли бўлган контентни YouTube’га жойлаштиришларини айтади.

«Тожикфильм» давлат дирексияси бўлим мудири Носир Раҳмоннинг айтишича, мамлакатнинг амалдаги қонунларига кўра, аудио ва видеоматериаллар, жумладан видеороликлар ишлаб чиқариш ва эълон қилиш учун уларни яратувчилар рухсатнома олиши керак. Раҳмоннинг сўзларига қараганда, улар видеоблогерларнинг фаолиятига қарши эмас, бироқ у YouTube’га жойлаштирилаётган видеороликлар сифати ва мазмунининг жуда ҳам пастлигидан ташвишга тушаётганини билдирди.

«Биз аввалига видеороликлар мазмунини кўришимиз керак. Одамлар бу роликларнинг айримларини кўрар экан, улар уялиб кетмоқда. Бошқа мамлакатларда фойдаланувчилар томонидан YouTube’га жойлаштириладиган роликларни кўрсангиз маънан дам оласиз. Бизда эса ҳаммаси «колхоз бозори«, – дея эътироз билдиради суҳбатдош.

YouTube’нинг Тожикистонда ваколатхонаси йўқ. Носир Раҳмоннинг сўзларига қараганда, улар YouTube’нинг Россия ва Қозоғистондаги вакилларини топган ва уларга махсус рухсатномасиз Тожикистондан видеороликларни жойлаштирмасликларини сўраб расман илтимоснома юборилган.

Сўнгги йилларда YouTube’да Тожикистоннинг ўнлаб фуқаролари томонидан аккаунтлар очилиб, унга ўзларининг видеоматериалларини жойлаштирмоқда. Видеоблогерлар турли мавзуларни қамраб олишга интилмоқда.

Шу билан бирга мамлакат солиқ қўмитасидагиларнинг таъкидлашича, YouTube’га ўзларининг видеорликларини жойлаштирувчи видеоблогерлар бошқа фуқаролар сингари солиқ тўлаши керак.

«Тожикистон фуқароларининг мамлакат ичкариси ва ташқарисидаги ҳар қандай даромадлари солиққа тортилиши керак. Даромадларни яшириш ёки солиқдан бўйин товлаш қонун бўйича жазоланади», – дея таъкидлади қўмита ходимлари.