АҚШ президенти администрацияси валютани манипуляция қилишда гумон қилинаётган мамлакатлар рўйхатини кенгайтиришга тайёрланмоқда. Бу ҳақда Bloomberg агентлиги маълумотига таяниб, «ТАСС» хабар берди.
АҚШ Молия вазирлиги ҳар йили икки мартадан тайёрлайдиган ҳисоботда бошқа маълумотлар билан бир қаторда валюталарни манипуляция қилишда гумон қилинаётган мамлакатлар рўйхатини ҳам эълон қилади.
Агентлик маълумотларига кўра, апрель ойида чиқадиган ҳисоботда бундай мамлакатлар сони тахминан 20 та бўлиши кутилмоқда. Аввалги ҳисоботда улар сони 12 та бўлган. Қайд этилишича, рўйхат Молия вазирлиги унга киритишга таъсир кўрсатадиган мезонлардан бирини ўзгартиргани сабабли кенгаяди.
Ҳозирда АҚШ ўзининг йирик савдо шериклари бўлган мамлакатлар ва Швейцариянинг миллий валюталар билан операциясини назорат қилмоқда.
Bloomberg’нинг қайд этишича, кенгайтирилган рўйхатга АҚШ билан савдо балансида катта профицитга эга Вьетнам, Индонезия, Ирландия, Малайзия, Россия ва Таиланд киритилиши мумкин. Ҳиндистон ва Жанубий Корея бу рўйхатдан чиқарилиши кутилмоқда.
Изоҳ (0)