9 май – Хотира ва қадрлаш куни муносабати билан Ўзбекистоннинг Германиядаги элчихонаси Берлинда Иккинчи жаҳон урушида фашизм устидан қозонилган ғалабанинг 74 йиллигига бағишланган маросимда иштирок этди. Бу ҳақда элчихона матбуот хизмати «Дарё»га маълум қилди.
Германия пойтахтининг Трептов парки ва Тиргартен ёдгорлик мажмуасида 1941—1945 йилларда фашизм устидан қозонилган ғалаба учун ҳалок бўлган аскарлар хотирасига ҳурмат бажо келтириш мақсадида номаълум солдат ҳайкали пойига гулчамбарлар қўйилди.
Тадбирда урушда омон қолган фахрийлар, Германия ҳукумати аъзолари, Берлинда жойлашган дипломатик ваколатхоналар ва халқаро ташкилотларнинг вакиллари ҳамда кенг жамоатчилик иштирок этди.
Тадбир қатнашчилари орасида Ўзбекистонни яхши таниган, билган кишилар Ўзбекистон ҳақида ўзларининг илиқ таасуротлари билан ўртоқлашди.
Шунингдек, урушда ҳалок бўлган ўзбекистонликлар ёди учун Қуръон тиловат қилинди.
Бундан 50 йилча муқаддам мен фуқаро авиацияси учувчилиги йўналиши бўйича Ленинград авиация техникумида таҳсил олганман. Талабалик давримда Марказий Осиёдан, хусусан, Ўзбекистондан ҳам кўплаб дўстлар орттирганман. Кейинчалик учувчи сифатида кўп маротаба пойтахтингиз Тошкент шаҳрида бўлдим. Менда мамлакатингиз ҳақида фақат илиқ хотиралар қолган. Бугунги кунда ҳам Ўзбекистонда бир қанча дўстларим ва танишларим яшашади. Улар билан доим алоқадаман. Шу боис мамлакатингизда амалга оширилаётган улкан бунёдкорлик ишларидан воқифман.Бугун мен ушбу ёдгорлик мажмуасига Иккинчи жаҳон урушида жасорат ва матонат кўрсатиб, бизни фашизмдан озод қилган ота-боболарингиз хотирасига эҳтиром кўрсатиш учун келдим.
Ульрих Унгер, собиқ учувчи
Изоҳ (0)