Баҳсли «Ўлмас полк» акцияси Тошкентда 9 май куни барибир ўтказиладиган бўлди, деб ёзади «Minbar.uz». Ташкилотчиларнинг айтишича, акция иштирокчилари СССР мадҳиясининг садолари остида «Биродарлик қабристони»дан Мустақиллик майдонига пиёда боради.
«9 май куни тротуарлар ва пиёда йўлкалари бўйлаб «Биродарлик қабристони» мажмуасидан то Мустақиллик майдонидаги Мангу олов ёдгорлигигача мусиқий дастур билан пиёда юрамиз», – деб ёзган акция ташаббускорларидан бири Тимур Исмоилов.
Тошкент шаҳар ҳокимлиги матбуот хизмати хабарига кўра, шаҳар аҳолиси ва меҳмонлари учун 9 май, пайшанба куни «Биродарлар қабристони»ни зиёрат қилиш соат 10:00 дан бошланади.
Ф.Русанов номидаги Ботаника боғи ҳамда Тошкент ҳайвонот боғига кириш эса 14:00 дан бошланади.
9 май — Хотира ва қадрлаш кунига бағишлаб «Биродарлар қабристони»да байрам тадбири ўтказилиши режалаштирилган. Шу муносабат билан 9 май куни шаҳардаги Шота Руставели, Чўпон ота, Боғи бўстон кўчаларининг «Биродарлар қабристони»га туташ бўлган қисмида автомобиллар ҳаракати соат 7:00 дан 10:00 гача вақтинчалик чекланади.
Изоҳ (0)