Самарқандда марҳум ҳарбий хизматчи оиласи ҳолидан хабар олинди
Самарқанд вилоятида 9 май – Хотира ва қадрлаш куни арафасида хизмат бурчини бажариш чоғида ҳалок бўлган ҳарбий хизматчилар жасорати ёд этилиб, уларнинг оила аъзоларига моддий-маънавий ёрдам кўрсатилмоқда. Бу ҳақда «Дарё»га Мудофаа вазирлиги матбуот хизмати хабар берди.
Самарқанд шаҳрида бўлиб ўтган ана шундай тадбирлардан бирида Марказий ҳарбий округ қўшинлари қўмондонининг биринчи ўринбосари К. Ачилов, Пастдарғом тумани мудофаа ишлари бўлими вакиллари, Самарқанд шаҳрида жойлашган ҳарбий қисмнинг тарғибот гуруҳи аъзолари ва ўқувчи-ёшлар марҳум ҳарбий хизматчи Лочинбек Ҳайитовнинг оиласи – Нафосат Юсупова хонадонида бўлди.
Учрашув давомида Лочинбек Ҳайитовнинг юксак фазилатлари, ҳарбий хизмат давридаги шижоати ва мардлиги ёдга олинди.
Марҳум Лочинбек Ҳайитов 2014 йилда хизмат вазифаларини бажариш вақтида ҳалок бўлган эди. Тадбирда Лочинбек Ҳайитов оиласига Ўзбекистон Мудофаа вазирлиги томонидан ажратилган пул мукофоти ва совға-саломлар топширилди.
Шимоли-ғарбий ҳарбий округ қўшинлари қўмондони полковник Дилшод Чориев бошчилигидаги бир гуруҳ ҳарбий хизматчилар эса ўз хизмат мажбуриятларини бажариш вақтида тан жароҳати олган нафақадаги Қуролли Кучлар ҳарбийларини йўқлаб борди.
Уларнинг Ватан тинчлиги йўлида қилган хизматлари ҳеч қачон унутилмаслиги, доим эътибор ва эъзозда бўлиши таъкидланиб, байрам совғалари улашилди.
