ИИВ транспортда хавфсизликни таъминлаш бош бошқармаси ва Самарқанд вилояти ИИБ ходимлари Пахтачи тумани «Қорақўтон» руда конида тезкор тадбир ўтказди. Бу ҳақда «Дарё»га Самарқанд вилоят ИИБ транспортда жамоат хавфсизлигини таъминлаш бўлими матбуот хизмати маълум қилди.
Жорий йил 21 апрелдан 26 апрелга қадар «Қорақўтон» руда конида ўтказилган тезкор тадбирлар давомида давлат шахталарига ноқонуний равишда кириб, у ердан таркибида олтин моддаси ва бошқа қимматбаҳо металлар бўлиши мумкин бўлган руда тошларни яширин равишда талон-торож қилаётган «Бурқут» номи билан танилган жиноий гуруҳ аъзолари қўлга олинган.
Хусусан, «Аска» лақаби билан танилган жиноий гуруҳ бошлиғи, 1988 йилда туғилган фуқаро Асрор Омонов икки йилдан буён гуруҳнинг 4 нафар аъзоси билан ноқонуний равишда руда конидан тошларни олиб чиқиб кетаётганлиги аниқланган. Омонов «Шокир» исмли шахснинг яшаш уйида қўлбола усулда ясалган руда тошларни бўлаклаш ва майдалашга мўлжалланган тегирмондан фойдаланиб, уларнинг таркибида бўлган олтин моддасини «Ойбек» ва «Жасур» исмли шахсларга нақд пулга ўтказиб келганлиги аниқлаган.
Аниқланган ҳолатлар юзасидан юқоридаги шахсларга нисбатан баённома расмийлаштирилиб, маъмурий ишлар бўйича Пахтачи туман судининг ҳукмига кўра 15 сутка маъмурий қамоқ жазоси қўлланилди.
Тадбир давомида «Уста» тахаллуси билан танилган, 1991 йилда туғилган, муқаддам Жиноят Кодексининг 169-моддаси (ноқонуний равишда таркибида олтин моддаси бўлган руда тошлари савдоси) билан судланган, Пахтачи тумани Жаҳонобод махалласида яшовчи Феруз Давроновнинг яшаш уйи кўздан кечирилганда таркибида олтин моддаси ва бошқа қимматбаҳо металлар бўлиши мумкин бўлган жами оғирлиги 2 тонна бўлган руда тошлари холислар иштирокида ҳужжатлаштириб олинган.
Шунингдек, «Бекки» тахаллусли Бекзод Назаровнинг уйидан 300 килограмм, Лазиз Бобоназаровнинг уйидан 800 килограмм, Жамолиддин Мирзаевнинг уйидан 400 килограмм бўлган руда тошлари топилган. Мазкур ҳолат юзасидан тўпланган ҳужжатлар Пахтачи тумани ИИБ ҳузуридаги Тергов бўлими томонидан терговга қадар текширув ҳаракатлари олиб борилмоқда.
Текширув жараёнида Отамурод Қодировнинг яшаш уйидан руда тошларни бўлаклаш ва майдалашга мўлжалланган қўлбола усулда ясалган тегирмон ва дробилка борлиги аниқланган.
Самарқанд вилоят ИИБ транспортда жамоат хавфсизлигини таъминлаш бўлими ходимлари томонидан таркибида олтин моддаси ва бошқа металлар бўлиши мумкин бўлган руда тошларини ўғирлаган, руда тош ва руда қумлар таркибидан олинган олтин моддасини сотиб олувчи шахслар бўйича қўшимча равишда тезкор суриштирув ҳаракатлари давом этмоқда.
Изоҳ (0)