Шимолий Корея раҳбарининг акаси — Ким Чен Намнинг ўлдирилишида айбланган Вьетнам фуқароси Доан Тхи Хуонг 3 май куни озодликка чиқди. Бу ҳақда TJournal хабар берди.
Қамоқхона вакилининг сўзларига кўра, аёл ҳужжатларни олиш учу иммиграция бўлимига кетган бўлиб, шундан сўнг уйига қайтади. Унинг нима сабабдан озод этилгани номаълум.
Малайзия Олий судининг 1 апрелдаги қарорига асосан Доан Тхи Хуонг уч йил-у тўрт ойга озодликдан маҳрум қилинганди. Вақтинча ҳибсда сақланган муддати ҳам ҳисобга олинганда, аёл яна бир йил қамоқда ўтириши керак эди. Бу вақтгача аёлдан қасддан одам ўлдириш айблови олиб ташланиб, «ўлимга олиб келган соғлиққа шикаст етказиш» айбловига ўзгартирилган.
Доан Тхи Хуонг ушбу жиноят ишида иштирок этган иккинчи ва охирги шахс бўлди. Март ойида яна бир гумонланувчи — индонезиялик Сити Айшага қарши жиноий таъқиб тўхтатилган.
Ким Чен Нам 2017 йил 13 февраль куни Куала-Лумпур аэропортида ўлдирилган эди. Унинг юзига асабни фалажловчи VX кимёвий моддаси сепиб кетилган. Қўлга олинган аёллар айбини тан олмаган. Судда уларнинг адвокатлари аёллар янглиштириб, реалитй-шоуда иштирок этишаётгани ва ҳаёт учун хавфсиз бўлган суюқлик сепишларига ишонтирилганини айтган.
Изоҳ (0)