Флорида штати ҳуқуқ-тартибот идоралари бундан салкам 50 йил олдин содир этилган қотиллик гумонланувчисини қўлга олди. Бу ҳақда News&Observer газетасига таяниб, «РИА Новости» хабар берди.
Жиноят 1972 йилнинг декабрида Шимолий Каролина штатида содир бўлган. 33 ёшли аёл қўлида чақалоғи билан тўнғич фарзандини мактабдан олиб келиш учун уйидан чиқиб, қайтиб келмаган. Узоқ қидирувлардан сўнг, Бонни Нейробснинг жасади Бенсон шаҳри яқинидаги ишчи муҳожирлар уйидан топилган. Ёнида эса чақалоғи тирик ётган.
Таъкидланишича, Жонстон округи шерифи Стив Биззелл ушбу қотиллик иши бўйича 2007 йилда жиноят ишини очган. 2019 йилнинг 29 апрель куни Флоридада 65 ёшли Ларри Жо Скотт ҳибсга олинган. У одам ўғирлаш ва қотилликда айбланмоқда. Кейинроқ Скотт Шимолий Каролинага экстрадация қилинади.
Қотил ва қурбон ўртасидаги боғлиқлик ҳозирча ўрнатилгани йўқ. Жиноят сабаблари ҳам айни вақтда номаълум. Скоттнинг ҳибсга олинишига янги технологиялар асосида амалга оширилган ДНК тести сабаб бўлган. Округ шерифининг сўзларига қараганда, ҳозирда якуний тестлар ўтказилмоқда.
Изоҳ (0)