3 майнинг эътиборга молик янгиликлари — «Дарё» дайжестида.
Бугун, 3 май куни Ўзбекистон Республикаси Олий Мажлиси Сенатининг ўн тўққизинчи ялпи мажлиси бўлиб ўтди.
Сенат раиси ўз нутқида мамлакатдаги суғурта қонунчилиги мазмунан эскиргани ҳамда суғурта бозори эътибордан четда қолаётганини таъкидлади.
Сенат раиси одамлар зарарли моддалар билан тўйинган сувни истеъмол қилаётганини маълум қилди.
Сенат раиси ногиронликни белгилашда қонунда кўзда тутилмаган қўшимча ҳужжатлар талаб қилинишини танқид қилди.
Шунингдек, Тошкент вилоятида 15 800 та иш ўрни бўш турганлиги маълум қилинди.
«Давлат-хусусий шериклик тўғрисида»ги қонун сенаторлар томонидан маъқулланди.
Ўзбекистонда 2017—2018 йилларда қарийб 1200 киши овқатдан заҳарлангани, улардан 222 нафари болалар эканлиги маълум қилинди.
Сенатнинг ўн тўққизинчи ялпи мажлисида парламент аъзолари «Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги Ўзбекистон Республикаси Қонунини кўриб чиқди.
Бундан ташқари, парламент аъзолари «Яйловлар тўғрисида»ги Ўзбекистон Республикаси Қонунини кўриб чиқди.
Сенаторлар «Ўзбекистон Республикасининг Иқтисодий процессуал кодексига ўзгартиш ва қўшимчалар киритиш тўғрисида»ги Ўзбекистон Республикаси Қонунини кўриб чиқди.
***
Тошкентда автобус бекатдаги икки пиёдани уриб кетди, улар ҳалок бўлди.
3 май куни тахминан 14:30 да Тошкент ҳалқа автомобиль йўлига бириккан иккинчи даражали йўлдаги «Чиннибозор» жамоат транспорти бекатида ЙТҲ содир бўлди. ЙТҲ оқибатида 14 ёшли қиз ва 30—35 ёшлардаги аёл воқеа жойида ҳалок бўлган.
***
Фарғонада туғилган уч эгизакка Шавкатжон, Зироатхон ва Саидахон исмлари қўйилди.
Исломжон ва Дилоромхон Исроиловлар оиласида туғилган чақалоқларга Ўзбекистон Президенти ва унинг оиласи шарафига исмлар танланган. Эгизакларга Шавкатжон (Ўзбекистон Президенти Шавкат Мирзиёев шарафига), Зироатхон (Ўзбекистон Президентининг рафиқаси Зироатхон Мирзиёева шарафига) ва Саидахон (Ўзбекистон Президентининг катта қизи Саида Мирзиёева шарафига) деб исм қўйилган.
***
Тошкентда келинлар сайли бўлиб ўтди.
100 нафар гўзал қизлар шаҳар марказида тўй либосларида мусиқа садолари остида ҳаракатланиб, ўзига хос рақс ҳам намойиш этди.
***
Шавкат Мирзиёев дронлардан ноқонуний фойдаланганларни озодликдан маҳрум этиш тўғрисидаги қонунни имзолади.
Қонунга кўра, Жиноят кодексига учувчисиз учадиган аппаратларни қонунга хилоф равишда олиб кириш, ўтказиш, олиш, сақлаш ёки улардан фойдаланиш учун уч йилгача озодликдан маҳрум қилиш жазоси киритилди.
Изоҳ (0)