Тошкент вилояти Қуйи Чирчиқ туманида «Обод қишлоқ» дастурига ажратилган маблағдан қарийб 100 миллион сўмни ўзлаштирганлар қўлга тушди. Бу ҳақда вилоят ҳокимлиги ахборот хизмати маълум қилди.
2018-йилда Тошкент вилояти Қуйи Чирчиқ туманидаги “Кушек” қишлоғи “Обод қишлоқ” дастурига киритилиб, ҳудудда комплекс янгилаш ишлари амалга оширилган. Уй-жойлар таъмирланиб, ён-атрофи ободонлаштирилган. Ичимлик суви тармоқлари, қишлоқни туман маркази билан боғлайдиган ҳамда қишлоқ ички йўллари ва пиёдалар йўлаклари барпо этилган. Шу жараёнда Тошбой Исмоилов (исм-фамилиялар ўзгартирилган) раҳбарлик қилаётган “Agrotexsanoatxolding Qurilish” МЧЖ билан туман ободонлаштириш бошқармаси ўртасида шартнома имзоланади.
Унга мувофиқ, жамият томонидан қишлоқдаги уйлар атрофи ободонлаштирилиб, декоратив йиғма девор билан ўраш белгиланади. Т.Исмоилов шартнома шартларини бажаришга киришади. У дастлаб 4 миллион 800 минг сўмлик декоратив йиғма девор олиб келиб ўрнатади. Қолган ишлар эса ўз ҳолига ташлаб қўйилади. Бу орада туман ободонлаштириш бошқармаси бошлиғи Фарид Абилов МЧЖ раҳбарига бир неча марта қўнғироқ қилиб, қолган ишларни ҳам охирига етказишни талаб қилади. Т.Исмоилов эса ҳисоб рақамида пул йўқлиги, шартномада кўрсатилган пулларни ўтказиб берса, ишни битиришини айтади.
Аслида шартномага мувофиқ, бажарилиши лозим бўлган ишлар охирига етказилгач, кўрсатилган маблағ МЧЖнинг ҳисоб рақамига ўтказилиши керак эди. Туман ободонлаштириш бошқармаси бошлиғи Фарид Абилов буни жуда яхши билсада, Т.Исмоиловнинг найрангига «лаббай» дея жавоб бериб, барча ишлар тўлиқ бажарилгани ҳақида далолатнома тузиб, расмийлаштиради. Ишлар бажарилмаганини била туриб, далолатномага имзо чекиб юбораверади.
Оқибатда «Обод қишлоқ» дастурига ажратилган маблағдан 123 миллион 234 минг сўм пул бажармаган ишлари учун «Agrotexsanoatxolding Qurilish» МЧЖ ҳисоб рақамига ўтказиб берилади. Мақсадига эришган Т.Исмоилов пул келиб тушиши билан уларни ўзлаштириб, талон-торож қилади. Ф.Абилов эса ноқонуний ҳаракати оқибатида чапак чалиб қолаверади.
«Қинғир ишнинг қийиғи қирқ йилда ҳам чиқади» деганларидек, Т.Исмоилов ҳамда Ф.Абиловнинг қилмишлари фош бўлди. Уларга жиноят ишлари бўйича Қуйи Чирчиқ тумани судининг ҳукми билан тегишли жазо тайинланди.
Изоҳ (0)