Бош прокуратура ҳузуридаги Департаментнинг Сурхондарё вилояти Жарқўрғон туман бўлими ходимлари томонидан ўтказилган тезкор тадбирда, фуқаро Э.Т. фуқаро С.Э.нинг жиянининг танишлари орқали Термиз давлат университетининг Иқтисод факультетига ўқишга киритиб қўйиш эвазига 4000 АҚШ долларини фирибгарлик йўли билан олган вақтида ашёвий далиллар билан ушланган. Бу ҳақда Бош прокуратура хабар бермоқда.
Мазкур ҳолат юзасидан Э.Т.га нисбатан Ўзбекистон Республикаси Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Қонунчиликка кўра, пора олиш, пора бериш ёки пора олиш-беришда воситачилик қилиш учун жиноий жавобгарлик белгиланган, аммо бундай жиноятлар ҳақида қонунда белгиланган (30 кун) муддат ичида ҳуқуқни муҳофаза қилувчи органларга хабар берган шахслар жиноий жавобгарликдан озод қилиниши кўзда тутилган.
«Шу сабабли, Сиз юқоридаги каби турли ноқонуний йўллар билан ўқишга киритишга ваъда бериб, таъмагирлик қилаётган фуқаролар ёки мансабдор шахсларга дуч келсангиз, Ўзбекистон Республикаси Бош прокуратурасининг қисқа рақамли 10-07 ёки Департаментнинг 71-233-10-07 рақамли туну-кун ишловчи ишонч телефонларига мурожаат этишингизни сўраймиз», — дейилади хабарда.
Изоҳ (0)