Ўзбекистонда апрель ойида инфляция даражаси 0,9 фоизни ташкил этди

Ўзбекистонда апрель ойида инфляция даражаси 0,9 фоизни ташкил этди. Бу ҳақда Давлат статистика қўмитаси маълумотларига асосланиб, Spot хабар берди.

Таққослаш учун, январь ойида инфляция кўрсаткичи 1,5 фоизни, февралда 1,6 фоизни, март ойида эса 1,2 фоизни ташкил этган.

Йил бошида Марказий банк Ўзбекистон иқтисодиётининг ривожланиши бўйича ўзининг таянч сценарийсида 2019 йилда инфляция даражаси 13,5—15,5 фоиз атрофида бўлишини прогноз қилиб, биринчи чоракда йиллик инфляция даражаси ўзнинг энг юқори чўққисига чиқишини тахмин қилган.

Бу 2018 йил якунига кўра, ҳақиқий инфляция даражаси прогноз қилинганига нисбатан паст бўлгани билан изоҳланган. Бизнес янги солиқ сиёсатидан нима кутишни билмагани сабабли нархларни кескин кўтармагани бунинг яна бир омилларидан бири бўлган.

«2018 йилнинг охиригача корхона ва тадбиркорларнинг аксарияти солиқ соҳасидаги ислоҳотлар чиқимларга қандай таъсир кўрсатиши ҳақида аниқ тушунчага эга эмас эди», — деб таъкидлаган эди Марказий банк.

Бундай ноаниқлик шароитида тадбиркорлар нархлар ва тарифларни оширмади ва бу масалани солиқ қонунчилигига киритилган ўзгаришлар кучга кирганидан кейин вазият аниқлашган вақтга қолдирган.

Янги солиқ тизими 1 январдан кучга кирди ва бизнес унга мослашишни бошлади. Бу даврда инфляция даражасининг ошиши ва кейинчалик пасайиши билан қисқа муддатли ўзгарувчанлиги қайд этилган.

Инфляция кўрсаткичи февраль—март ойларида энг юқори чўққига чиққанидан сўнг, Марказий банк прогноз қилганидек пасая бошлаган. Аммо июнь ойида электр энергияси ва табиий газ тарифларининг ошиши режалаштирилгани унинг пасайишда давом этишига чек қўяди.