UNICEF ва Соғлиқни сақлаш вазирлиги Тошкент вилояти учун замонавий совутгичлар билан жиҳозланган вакциналар омборхонасини ишга туширди. Бу ҳақда «Дарё»га UNICEF’нинг Ўзбекистондаги ваколатхонаси маълум қилди.
UNICEF ва GAVI (Вакциналар ва иммунизация бўйича глобал альянс) —ташкилоти томонидан 2018 йили Ўзбекистонга ажратилган 22 миллион долларлик грант ҳисобидан Қорақалпоғистон Республикаси, Тошкент шаҳри ва барча вилоятларда жами 21 та вакцина сақлаш омборхоналарини қуриш ва уларни жиҳозлаш белгиланган.
«Ушбу омборхоналарнинг қулайлиги — ҳамма вакциналарни битта жойда сақлаш мумкин. Авваллари электр энергиясидан 6 соатдан ортиқ узилиш бўлса, вакциналарни бошқа жойга кўчиришга мажбур бўлардик. Янги омборда эса электрдан узилиш бўлганда, автоматик равишда генератор ишга тушади», — деди Тошкент вилояти Давлат санитария-эпидемиология назорати маркази бўлим мудири Насиба Тоирова.
Янги вакциналар омборхонаси бир ёшгача бўлган 64 400 болани эмлашга етарли бўлган 31 000 литр, яъни 440 куб метр ҳажмдаги вакциналарни сақлаш имконини беради. Ичида юриш мумкин бўлган иккита совутгич камераларда вакциналарни сифатли сақлаш учун зарур бўлган Цельсий бўйича 2—8 даража совуқ доимий равишда ушлаб турилади. 5 ёшгача бўлган болаларнинг сони ошганини инобатга олган ҳолда янги омборхона ҳажми аввалгисига нисбатан икки баробар катталашган.
Республика Давлат санитария-эпидемиология назорати маркази бош шифокори Баҳром Алиматовнинг айтишича, шу вақтга қадар мавжуд вакцина омборлари эҳтиёжнинг 50 фоизини қоплаган холос. Барпо этилаётган янги омборхоналар талабни тўлиқ қондиришга имконият яратади.
«Гап вакциналарнинг хавфсизлиги тўғрисида кетар экан, уларни етказиб беришни ва логистикани бошқариш жуда муҳим рол ўйнайди. Мазкур совуқлик омбори келгусида узлуксиз ишлаши малакали ходимлар ва ҳукуматнинг ушбу тизимни бошқариш ва унинг ишлашини таъминлаш учун зарур сармоялар киритиш борасидаги мажбуриятига боғлиқ бўлади,» — деди UNICEF’инг Ўзбекистондаги ваколатхонаси раҳбари Саша Грауманн.
Изоҳ (0)