Хитойнинг Циндао ва Пекин шаҳарларида IV ШҲТ ёшлар оромгоҳи ташкилланди. Унда тузилмага аъзо ва кузатувчи мақомидаги 14 давлатдан ёшлар ташкилотларининг 200 нафарга яқин вакили қатнашмоқда. Бу ҳақда «Дарё»га Ёшлар медиа маркази маълум қилди.
Циндао шаҳрида жойлашган Фухин меҳмонхонасида оромгоҳнинг тантанали очилиш маросими бўлиб ўтди. Маросимдан сўнг иштирокчилар Haier ва TGOOD корпорациялари тарихи, фаолияти, олдига қўйган истиқболдаги режалари билан таништирилди.
Циндао шаҳридаги «Айсберг чўққиси» марказида ШҲТ доирасида минтақавий савдо-иқтисодий ҳамкорлик бўйича семинар-тақдимот ўтказилди. Семинар якунида «Хонгдеюан» замонавий қишлоқ хўжалиги технологиялари компанияси директори Ванг Kиан Ўзбекистон қишлоқ хўжалиги соҳасида мавжуд имтиёзлар, хусусан, ерларнинг 49 йилга тўловсиз ижарага берилаётганига юқори баҳо бериб, хитойлик тадбиркорлар Ўзбекистон билан мазкур йўналишда янада кенг ҳамкорлик қилишини таъкидлаб ўтди.
Тадбир иштирокчилари Циндао порти, Хитой—Германия экобоғи, Фан ва техника миллий тажриба лабораторияси, Хитой уммоншунослик университетига саёҳат қилди.
Қатнашчилар учун қадимий Жимо шаҳрида ШҲТ ёшлар масалалари бўйича ҳамкор давлатларининг кўргазмали бизнес мулоқотлари ташкил этилди. Унда Ўзбекистон ёшлар иттифоқи делегацияси Мўғулистон, Камбоджа, Эрон, Ҳиндистон, Беларусь, Озарбайжон каби давлатлар билан ёшлар сиёсати, туризм, қишлоқ хўжалиги, тадбиркорлик соҳаларида музокаралар олиб борди.
IV ШҲТ ёшлар оромгоҳи 2 май кунига қадар давом этади.
Изоҳ (0)