Ўзбекистонда 8 та маҳаллий йўналишда мунтазам автобус қатновлари йўлга қўйилди

Ўзбекистонда бугун, 1 майдан бошлаб 8 йўналишда мунтазам автобус қатновлари йўлга қўйилди. Бу ҳақда ЎзА хабар берди.

Улар «Тошкент — Гулистон — Янгиер», «Тошкент — Самарқанд», «Тошкент — Навоий — Бухоро», «Тошкент — Термиз», «Тошкент — Зомин», «Тошкент —Гагарин», «Тошкент — Денов», «Тошкент — Қоракўл» йўналишлари.

«Uzavtotrans Service» корхонасининг Yutong автобуслари қўйилган маҳаллий қатновлар ҳар куни «Тошкент» автовокзалидан амалга оширилади. Автобуслар замонавий бўлиб, уларда йўловчилар учун барча қулайликлар мужассам. Кондиционер, иқлим назорати, мультимедиа тизими шулар жумласидан. Бу жараёнда хавфсизлик масалаларига алоҳида эътибор қаратилган бўлиб, йўналишга жўнайдиган ҳар бир автобус техник кўрикдан, ҳайдовчилар эса тиббий кўрикдан ўтказилади.

Автобусларнинг санитар ҳолати мунтазам назорат остида бўлиб, қатнов жараёни GPS тизими орқали онлайн назорат этилади.

Эртадан, 2 майдан «Тошкент — Туркистон», «Тошкент— Олмаота», «Тошкент— Ушкунур», «Чирчиқ — Ушкунур» йўналишларида халқаро қатновлар ҳам бошланади.

«Uzavtotrans Service» МЧЖ ушбу мақсадлар учун Хитойда ишлаб чиқарилган 100 дона юмшоқ ўринли Yutong автобусини харид қилди.