Ташқи ишлар вазири Абдулазиз Комилов Ўзбекистонда ташриф билан бўлиб турган Эрон олий диний раҳбарининг махсус вакили, Ташқи алоқалар бўйича стратегик кенгаш раиси Камол Харрозий билан учрашди. Бу ҳақда ТИВ матбуот хизмати хабар берди.
Суҳбатда Ўзбекистон —Эрон кун тартибидаги масалалар ҳамда айрим халқаро ва минтақавий муаммолар муҳокама қилинди.
Учрашувда сиёсий, савдо-иқтисодий, инвестиция, транспорт-коммуникация, маданий-гуманитар ва бошқа соҳаларда ҳамкорлик қилишга ўзаро қизиқиш мавжудлиги тасдиқланди.
БМТ, ШҲТ, ИҲТ ва бошқа ташкилотлар доирасидаги ҳамкорлик масалаларига тўхталиб ўтилди. Эрон томони 2020 йилда ИҲТнинг Фан ва технологиялар бўйича Тошкент шаҳрида ўтказиладиган иккинчи саммитида иштирок этишини тасдиқлади.
Томонлар ташқи ишлар вазирликлари ўртасидаги сиёсий маслаҳатлашувларни ва Савдо-иқтисодий ва илмий-техникавий ҳамкорлик бўйича ҳукуматлараро қўшма комиссиянинг навбатдаги йиғилишини ўтказишни қўллаб-қувватлади.
Минтақавий масалалар бўйича фикр алмашиш чоғида «Мозори-Шариф — Ҳирот» темир йўлини қуриш истиқболларига алоҳида эътибор қаратилди, Ўзбекистон — Туркманистон — Эрон — Уммон транспорт йўлаги тўғрисидаги шартномани тўлақонли амалга оширишнинг минтақалараро алоқаларни мустаҳкамлашда тутадиган муҳим аҳамияти қайд этилди.
Учрашувда туристик ва маданий-гуманитар алмашувлар кўламини ошириш масалалари ҳам кўриб чиқилди.
Музокараларда Эрон элчиси Баҳман Дўрмоний иштирок этди.
Изоҳ (0)