«Тошкент савдо маркази» (собиқ «Абу Сахий») ҳудудидаги «Гипермаркет»га яқин жойда савдо қилаётган сотувчилар орасида 29 апрель куни норозилик келиб чиққан. Ушбу ҳолат юзасидан Тошкент шаҳар ҳокимлиги тушунтириш берди.
Маълум бўлишича, «Гипермаркет» атрофида савдо нуқталари ташкил этилмаган бўлиб, кийим-кечаклар билан савдо қилувчи сотувчиларнинг айримлари маҳсулотларини ерга ёйиб, фаолият юритган.
Айни шу ҳудудда 2019 йилги кузги-қишки мавсумга тайёргарлик юзасидан ичимлик суви қувурларини янгилаш кўзда тутилгани сабабли, уларга «Чинни бозор» ва «Бек барака» савдо мажмуалари оралиғидаги ҳудудда тегишли рухсатнома асосида савдо қилиш таклиф этилган.
Бу эса сотувчилар ўртасида тушунмовчиликка сабаб бўлган. Ушбу ҳолат бўйича тегишли ташкилотлар мутасаддилари иштирокида сотувчилар билан тушунтириш ишлари олиб борилиб, сув қувурларида амалга оширилиши режалаштирилган таъмирлаш-созлаш ишлари вақтинча тўхтатилган.
Шунингдек, ушбу сотувчиларнинг ҳар бири билан бозор маъмурияти ўртасида истисно тариқасида 2019 йил сентябрга қадар фаолият юритишларини таъминловчи шартномаларни имзолаш келишилган.
«Бунинг учун эса сотувчилар солиқ идорасидан якка тартибда тадбиркорлик билан шуғулланишни кафолатловчи рухсатнома олишлари талаб этилади», — дейилади ҳокимлик ахборотида.
Изоҳ (0)