Андижонда Ўзбекистон халқ шоири Муҳаммад Юсуф таваллудининг 65 йиллигига бағишланган тадбирлар ўтказилмоқда, деб хабар беради ЎзА.
Ўзбек халқининг ардоқли шоири Муҳаммад Юсуф таваллуд куни олдидан вилоятдаги таълим муассасаларида адабий анжуман, хотира ва шеърият кечалари бўлиб ўтди. Айниқса, 26 апрель – шоир таваллуд топган кунда ўтказилган тадбирлар адабиёт байрамига айланди, дейилади хабарда.
Андижон шаҳридаги Муҳаммад Юсуф хиёбонида ташкил этилган тадбирда давлат, жамоат ташкилотлари вакиллари, ёзувчи ва шоирлар, ижодкор ёшлар ҳамда адабиёт ихлосмандлари, республиканинг турли вилоятлари ҳамда қўшни Қирғизистондан келган меҳмонлар иштирок этди.
Тадбирда сўз олган Ўзбекистон Халқ шоирлари Маҳмуд Тоир, Усмон Азим ва бошқалар шоир хотирасини қадрлаш, шеъриятининг ўзига хос қирралари, ҳаёти, ижодини ўрганиш ва тарғиб этиш хусусида гапирди.
«Ўзбекистон Халқ шоири, марҳум Муҳаммад Юсуф бетакрор шеърлари билан юртдошларимиз қалбидан чуқур жой олган ижодкор эди. Эл-юрт муҳаббати, ҳурматига сазовор бўлиш ҳар бир ижодкорга ҳам насиб этавермайди. Муҳаммад Юсуф адабиётимизнинг ана шундай эҳтиром ва эътирофга эриша олган забардаст вакилларидан биридир», – дейди Ўзбекистон Халқ шоири Усмон Азим.
Тадбирда Андижон шаҳридаги Муҳаммад Юсуф номидаги она тили ва адабиёти фанини чуқурлаштириб ўқитишга ихтисослаштирилган мактаб ҳамда Намангандаги Ибрат номидаги хорижий тилларга ихтисослашган мактаб-интернат ўқувчилари томонидан шоир ижодидан намуналар ўқилди.
Тадбир иштирокчилари мактабда ташкил этилган «Муҳаммад Юсуф музейи» ва «Муҳаммад Юсуф издошлари» номли адабиёт тўгараги фаолияти билан танишди. Шунингдек, шоир ижодига бағишланган очиқ дарс ҳам меҳмонларда илиқ таассурот қолдирди.
Хотира тадбирлари шоир туғилиб ўсган Марҳамат туманидаги Қовунчи маҳалласида давом этди. Кенг жамоатчилик вакиллари, меҳнат фахрийлари, оқсоқоллар шоир қабри ёнида қуръон тиловат қилди.
Шоирнинг таваллуд куни ҳақиқий халқ, адабиёт сайлига айланиб кетди. Вилоятнинг барча туман ва шаҳарлари, республикамизнинг турли вилоятларидан устозлари ҳамроҳлигида ташриф буюрган ўқувчи ёшлар, адабиёт ихлосмандлари томонидан шоир қабрига гулдасталар қўйилди. Адиб яшаган хонадонда шеърият кечаси, мушоиралар ўтказилди.
«Муҳаммад Юсуф қабрини зиёрат қилиш, унинг хотирасини ёд этиш учун бутун синфимиз билан келдик, – дейди Марғилон шаҳридаги Эркин Воҳидов номидаги она тили ва адабиёти фанини чуқур ўқитишга ҳамда хорижий тилларга ихтисослаштирилган мактаб-интернат ўқувчиси Муаттар Маматкаримова. – Зеро, биз ёшларнинг шоирга бўлган ҳурматимиз жуда баланд, унинг шеърларини севиб ўқиймиз».
Тадбирларда қирғизистонлик бир гуруҳ ижодкорлар ҳам иштирок этиб, Муҳаммад Юсуф ижоди ҳақида илиқ фикрларни билдирди.
«Андижон вилояти ёзувчилар уюшмаси билан ижодий ҳамкорликни йўлга қўйиш мақсадида Андижонга келган эдик, – дейди Қирғизистон Ёзувчилар уюшмаси Жалолобод област бўлими раиси Самиддин Стамбеков. – Қарангки, ташрифимиз ўзбек халқининг ардоқли шоири Муҳаммад Юсуф таваллуд санасига тўғри келди. Шоир ижодини ўқиганман, у ҳақида кўп эшитганман. Лекин бугунги тадбирлардан жуда ҳайратландим. Ўзбек халқи ўз шоирини шу қадар ардоқлашига ҳавасим келди».
Муҳаммад Юсуф хотирасига бағишланган тадбирлар Андижон шаҳридаги Алишер Навоий номидаги маданият ва истироҳат боғи амфитеатрида катта концерт дастури билан якунланди.
Изоҳ (0)