Қарши муҳандислик иқтисодиёт институтининг «Иқтисодиёт» факультети декани А.Х. ўз мансаб ваколатини суиистеъмол қилиб, талабалар Қ.М. ҳамда О.А.дан уларни талабалар сафида қолдириши эвазига 400 долларни олаётган пайтида Иқтисодий жиноятларга қарши курашиш департаментининг Қашқадарё вилоят бошқармаси, вилоят прокуратураси ҳамда ДХХ вилоят бошқармаси ҳамкорлигида ўтказилган тезкор тадбир пайтида қўлга олинган.
Маълум бўлишича, факультет декани «Молия» йўналишида таҳсил олаётган талабалар Қ.М. ва О.А.ларни кўп дарс қолдирганликлари учун уларни талабалар сафидан чиқариши ва курсдан-курсга қолдиришини айтиб қўрқитган. Агар ҳар бири 200 доллардан жами 400 доллар берса, бу фикридан қайтишини билдирган.
Мазкур ҳолат юзасидан департаментнинг Қашқадарё вилоят бошқармаси томонидан Қарши муҳандислик иқтисодиёт институти деканига нисбатан Жиноят кодексининг 210-модда 2-қисми «в» банди (тамагирлик йўли билан пора олиш) билан жиноят иши қўзғатилиб, вилоят прокуратурасига юборилган. Ушбу модда бўйича айбдор деб топилган шахс 5 йилдан 10 йилгача озодликдан маҳрум этилиши мумкин.
Ҳозирда тергов-суриштирув жараёнлари бошлаб юборилган.
Изоҳ (0)