Жиззахда икки давлат чегарасини бузган шахсга нисбатан суд ҳукми ўқилди. Бу ҳақда «Дарё»га Жиноят ишлари бўйича Жиззах вилояти Мирзачўл туман судининг раиси Мақсуд Райимов хабар берди.
Фуқаро У.Расулов (исм шарифи ўзгартирилган) ишлаш мақсадида Қозоғистон Республикасига чиқиб кетади.
Бироқ у ерда ўйлаганидай иш ҳам пул ҳам тайёрмаслигига ўзи гувоҳ бўлиб, сарсон-саргардон бўлиб ортга қайтиш пайига тушади. Бироқ фуқаролик паспортини йўқотганлиги сабабли Ўзбекистон ва Қозоғистон Республикалари ўртасидаги давлат чегарасини чегара ва божхона назорати ўрнатилмаган ноқонуний йўллар орқали икки давлат чегаралари бўйлаб йўрнатилган сим тўсиқларини бузиб ўтиб, Ўзбекистон Республикаси ЖКнинг 223-моддаси (Қонунга хилоф равишда чет элга чиқиш ёки Ўзбекистон Республикасига кириш) 1-қисмида назарда тутилган жиноятни қасддан содир этади.
Жиззах вилоят ДХХ ходимлари томонидан олиб борилган тезкор қидирув натижасида сим тўсиқларни бузиб ўтган шахс У.Расулов эканлиги аниқланади ва унга нисбатан Ўзбекистон Республикаси ЖКнинг 223-моддаси 1-қисми билан жиноий иш қўзғатилиб, тегишли процессуал ҳаракатлар амалга оширилиб, иш мазмунан кўриб чиқишлик учун Мирзачўл туман судига юборилади.
Жиноят ишлари бўйича Мирзачўл туман суди томонидан У.Расулов Ўзбекистон Республикаси ЖК 223-моддасининг 1-қисми билан айбдор деб топилиб, 3 (уч) йил муддатга озодликдан маҳрум қилиш жазоси тайинланиб, 1 йил синов белгиланди.
Изоҳ (0)