Келес туманлараро почта алоқа боғламасига қарашли Шўро бозор алоқа бўлимига борганда фуқароларнинг мазкур тизим билан боғлиқ норозилигига сабаб бўлаётган ҳолатга гувоҳ бўлдик. Бу ҳақда «Ҳуқуқ» нашри хабар бермоқда.
Жойлардаги почта бўлимларида фуқаролардан истеъмол қилинган электр ва газ учун тўловлар қабул қилинади. Лекин истеъмол қилинган газ учун тўланган пул 100 фоиз истеъмолчи ҳисоб рақамига тушмас экан.
Келес туманлараро почта алоқа боғламасининг маълум қилишича, фуқаролар электр энергияси учун тўланган пуллар юз фоиз истеъмолчининг ҳисоб рақамига ўтказилади ва почта тармоқлари орқали тўланган пул маблағларининг 4 фоизи хизмат ҳақи ҳисобига электр тармоқлари корхонаси томонидан почтага берилади. Аммо газ учун тўланган маблағ истеъмолчининг ҳисоб рақамига ўтказиб берилишида почтада 2 фоиз хизмат ҳақи ушлаб қолинар экан.
— Почта бўлимига газ учун 1 миллион 700 минг сўм тўладим. Лекин шу пулдан почта ходимлари 34 минг сўмини ушлаб қолиб, қолганини ҳисоб рақамимга ўтказишибди, — дейди Шўро бозор алоқа бўлими орқали истеъмол қилинган газ учун тўлов қилган фуқаро Зуҳра ая. — Нима учун хизмат ҳақи фуқаролардан ушлаб қолинмоқда? Ахир почта бўлимига ўзимиз келиб тўловни амалга оширган бўлсак?
— Почта бўлими уйимга яқин бўлгани учун электр ва газ пулларини шу ерга тўлайман — дейди шу ҳудудда яшовчи фуқаро Йўлдош Асомов. — Бу йил табиий газ учун ҳар ойда 300-350 минг сўм тўлов қилдим. Ўтган йил ёзда эса 100 минг сўм атрофида тўловни амалга оширганман. Айни вақтдаги нарх-наводан келиб чиқадиган бўлсак, бир йилда ўртача табиий газ учун 2,5-3 миллион сўм тўлайман. Аммо шундан 50-60 минг сўмини почта олиб қўйди. Нима учун почтанинг хизмат ҳақи истеъмолчидан олиниши керак?
Маълум бўлишича, 2017 йил 7 июлида «Ўзбекистон почтаси» АЖ ва «Ўзтрансгаз» АК ўртасида аҳолидан табиий газ тўловларини қабул қилиш хизмати бўйича келишув тузилган. Унга кўра, почтанинг ҳудудий филиаллари аҳолидан истеъмол қилинган табиий газ учун тўланган сумманинг 0,1 фоизини хизмат ҳақи қилиб олиши белгиланган. Аммо бу фоиз почтага камлик қилган шекилли, 2018 йилнинг 6 февраль куни ушбу келишувга ўзгартириш киритилиб, яна бир қўшимча келишув имзоланган ва 0,1 фоиз хизмат ҳақи 2 фоизга оширилган.
Савол туғилади: хизмат ҳақи нима учун оширилди ва истеъмолчидан тўлов учун фоиз олиб қолиниши қанчалар асосли?
Изоҳ (0)