Фарғонада 2,5 миллиард сўмдан ортиқ маблағ эвазига «Ёшлар инновацион маркази» очилди

Фарғона шаҳрида қурилиши учун 2,5 миллиард сўмдан ортиқ маблағ сарфланган «Ёшлар инновацион маркази» фойдаланишга топширилди. Бу ҳақда «Дарё» мухбири хабар бермоқда.

Бир кунда мазкур марказ хизматларидан 500 нафар ёшлар фойдаланиши мумкин. Марказ биносида ёшлар қабулхонаси, «Ёшлар – келажагимиз» жамғармаси, «Ёш тадбиркор» консултатив маркази, ёшлар бандлигига кўмаклашиш бюроси, ёшлар туризм агентлиги, ёшларга тиббий ва психологик хизмат кўрсатиш маркази, «Ёш оила» инновацион маркази, кутубхона, юридик клиника, IT академия ҳамда Book cafe жойлашган.

Марказ ёшларни тадбиркорлик, китобхонлик, ахборот технологияларига қизиқтириш, уларга тиббий ва психологик ёрдам кўрсатиш бўйича иш олиб боради. Марказда барча хизматлар бепул тақдим этилади.

Инновацион марказда маҳаллий ва хорижий мутахассислар иштирокида онлайн мулоқотлар, семинар-тренинглар, илмий-техник йўналишдаги танловлар ўтказилади. Марказ фойдаланишга топширилиши билан 25 та янги иш ўрни яратилди.