Давлат хавфсизлик хизмати Қашқадарё вилоят бошқармаси ходимлари томонидан ўтказилган тезкор тадбир натижасида Косон туманида яшовчи Толиб Улуғов ва Шуҳрат Абдуллаев Чироқчи тумани ҳудудида 988,44 грамм миқдоридаги «героин» гиёҳвандлик моддасини 20.000 АҚШ долларига сотаётган вақтда қўлга олинди.
Шунингдек, ДХХ Фарғона вилоят бошқармаси ходимлари томонидан ҳам мамлакатга гиёҳванд моддалар олиб кирилишига чек қўйилди.
Аниқланишича, Фарғона тумани Водил қишлоғида яшовчи Шавкатжон Алижонов 1 кг. «опий» гиёҳвандлик моддасини 92 миллион сўмга сотади ва жиноий жавобгарликка тортилишидан қўрқиб, айланма йўллар орқали Қирғизистон Республикасига ўтиб кетади. Лекин бир оз муддат ўтгандан сўнг Фарғона шаҳрига қайтади.
Maxсус хизмат ходимлари томонидан ўтказилган тезкор тадбир давомида Шавкатжон Алижонов шаҳардаги кўп қаватли уйлардан бирининг ертўласида яшириниб юрган вақтида ушланади.
Терговолди суриштирув давомида маълум бўлишича, Шавкатжон Алижонов Қирғизистон Республикасида вақтинча бўлиб турганида, унинг кўрсатмаси билан ҳамқишлоғи Азамат Мухторов гиёҳванд моддалар савдосини давом эттирган.
Азамат Мухторов Андижон вилоятида яшовчи Альберт Саркисовга Фарғона шаҳрида 7,12 грамм «опий» гиёҳвандлик моддасини берганлиги аниқланди ва Саркисов Қува туманида далилий ашёлар билан қўлга олинди.
Бундан ташқари, хизмат ходимлари томонидан тўпланган тезкор маълумотлар асосида, «гашиш» гиёҳвандлик моддаси савдосининг ҳам олди олинди. Хусусан, ярим тунда Водил қишлоғидан Фарғона шаҳрига кириб келган Фарғона тумани Чимён қишлоғида яшовчи Абдуқаххор Абдулҳасанов бошқарувидаги Tico автомашинаси текшириш учун тўхтатилди ва машинада унинг шериги Шерзод Тўйчиев борлиги маълум бўлди. Автомобиль кўздан кечирилганида целлофан пакетга ўралган соф оғирлиги 499 грамм бўлган «гашиш» моддаси борлиги аниқланди.
Суриштирув ишлари давомида Шерзод Тўйчиев ушбу заҳри қотилни 2600 АҚШ долларига Водил қишлоғида яшовчи Ҳаёт Наврўзовдан сотиб олгани маълум бўлди ва кўрилган чора-тадбирлар натижасида Наврўзов ҳам ушланди. Аниқланишича, Ҳаёт Наврўзов айланма йўллар орқали Қирғизистонга ўтиб, Қадамжой тумани Халмиён қишлоғида яшовчи Шариф Исоқовдан 2300 АҚШ долларига ушбу гиёҳванд моддани сотиб олган экан.
Ҳозирда барча ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Изоҳ (0)