Бухоро шаҳри Мухтор Ашрафий номидаги 16-маҳалла фуқаролар йиғини ҳудудидаги сайёҳлар қатнайдиган асосий кўчалардан бири Дарвозаи ўғлон асфальтланмаган, канализация қувурлари таъмирга муҳтож, симёғочлар носоз...
Бухоро шаҳар марказий кўчаларини ободонлаштириш, унинг меъморий қиёфасини янгилаш бўйича самарали ишлар бажарилган бўлишига қарамай, анча йилдан буён муаммосини бартараф этиш устида жўяли бош қотирилмаган ҳолатлар ҳам йўқ эмас. Таъмирлаш ва асфальтлаш ишлари фақат катта йўл бўйида амалга оширилган. Маҳалланинг бир нечта ички кўчалари нохуш манзара касб этган.
— Кўчамизда 35 та хўжалик мавжуд. Уч йилдан буён кўчамизни асфальтлаш бўйича ваъдаларни эшитиб келамиз. 2018 йил июль–август ойларида сув қувурлари алмаштирилди. Лекин наридан-бери текислаб кетилди. Қишда лой, ёзда чанг. Кўчамизнинг носозлиги баттар ортди. Ёмғир кунлари кўчамиз тугул, хонадонларимизга кира олмаймиз. Дарвоза остигача ёмғир сувидан тўлади. Мурожаатимиз эса мутасаддиларни қизиқтирмаяпти, — деди фуқаро Сожида Тиллаева.
Аҳолини кўп йилдан буён қийнаб келаётган ушбу масалага аниқ ечим топилмаган. Кўча аҳволига сусткашлик билан қаралган. Кўча таъмирга муҳтож, асфальтланмаган. Эътиборли жиҳати, Дарвозаи ўғлон кўчаси шундоқ Ўзбекистон мусулмонлари идораси Бухоро шаҳар «Боло ҳауз» жомеъ масжиди орқа муюлишида жойлашган. Ҳар куни юзлаб сайёҳлар зиёратга келади.
Аҳолининг билдиришича, Дарвозаи ўғлон сайёҳлар қатнайдиган асосий кўчалардан бири. Электр тармоқларида тез-тез узилишлар содир бўлади. Симёғочлар ва электр ўтказувчи симлар носоз. Бунинг оқибатида кўча кечқурунлари қоронғи бўлади, ёруғлик йўқ.
— Ҳудудлардаги секторлар халқнинг муаммоларидан хабардор бўлиши керак. Лекин орадан шунча вақт ўтишига қарамасдан, бизнинг аҳолимиз сектор раҳбарини кўрмаган. Ҳудудимиз 3-секторга қарашли. 62 йилдан буён шу кўчада яшайман. Ўн йил давомида шаҳар ҳокими ижроия қўмитаси муовини бўлиб ишлаганман. Икки марта йўлни асфальт қилдирганман. Ҳар бир инсон қайси лавозимда ишламасин, ўз ишини сидқидилдан бажариши, нонини ҳалоллаб ейиши керак. Қани сектор, секторни раҳбари ким? Бирорта аҳоли кўргани йўқ. Дарвозама-дарвоза юрсин, аҳолининг аҳволини сўрасин. Ҳар бир дарвоза олдида сув қувури бор, лекин сувоқава тизими, канализация қувурлари носоз. Ҳар бир хонадон бир миллион сўмдан тўланглар, биз бориб тахлаб терамиз, дейишганига ҳайрон қолдик, — деди Мухтор Ғафуров.
Аҳолининг мурожаати ва кўчанинг носоз аҳволига мутасаддилар нега кўз юмган?
— Электр кучланиши жуда паст. Кондиционер, музлатгичлар ишдан чиқди. Кўчамизнинг «эртага тўкилиб, йиқилиб кетаман» кўйи носоз турган симёғочларини таъмирлаш ва тунги ёритиш тизимларини янгилаш учун, майли, пул йиғиб, электр симлариниям олиб берамиз. Фақат бизга таъмирлаб, созлаб беришсин. Аммо биз учун ҳозир энг муҳими, кўчамизни асфальтлаш масаласи. Сув қувурларини алмаштирамиз, деб йўлни бузишди, аммо охиригача тузатишмади. Шу ҳолда қолдириб кетишди, — деди фуқаро Акмал Нарзуллаев.
Маҳаллий аҳолининг айтишича, бу борадаги шикоят билан мурожаат қилинмаган жойнинг ўзи қолмаган. Натижаси эса ҳаминқадар.
— Телевидениеда ҳам «Мулоқот» кўрсатувида чиқиб, шахсан ўзим кўчамизнинг абгор аҳволи ҳақида сўзладим. Лекин фойдаси бўлмади. Мутасадди раҳбарлар кўз юмиб келишди, — деди шу кўчада яшовчи фуқаро Мақсад Салимова. — Ёғин-сочинли кунларда таъзия бўлиб қолса, аҳоли ўз кучи билан ўнқир-чўнқир ва ёмғир сувидан ҳосил бўлган кўлмакларга шағал ётқизади. Орадан бир неча кун ўтмай, азбаройи машиналар қатновидан шағаллар ёйилиб, кўча яна эски аҳволга келиб қолади.
Мурожаат жойида кўриб чиқилди: шағал келтирилди, техник воситалар жалб этилди... Аҳоли нимадан норози?
— Сектор раҳбари сифатида ўзим ҳам, сектор вакиллари ҳам доимий равишда тегишли ҳудудларда бўлиб, хонадонма-хонадон юриб, аҳоли ҳолидан хабар оламиз. Баҳолиқудрат, масалалар ўз жойида бартараф этиляпти. Дарвозаи ўғлон ҳолати бўйича эса айнан бизга биринчи марта мурожаат бўляпти. Шунга қарамасдан, ички йўлнинг таъмирталаблиги нуқтайи назаридан, ҳозирнинг ўзидаёқ кўчага шағал етказилиб, уни ётқизиш ва текислаш учун техник воситалар жалб этилади. Бироқ айнан ички ишлар органи сектори ушбу кўчани асфальтлаб бериш мажбуриятидан йироқ. Шу ўринда таъкидлашим жоизки, кўча мўлжалланган манзилли дастурга киритилган бўлса, демак, шу асосда тўлиқ таъмирланади, — деди Бухоро вилоят ИИБ бошлиғи, 3-сектор раҳбари Шуҳрат Алиев «Дарё» мухбири билан суҳбатда.Шундай бўлди ҳам. «Дарё»га мурожаат этилган сана – жорий йилнинг 11 апрель куни Дарвозаи ўғлон кўчасига 3-сектор томонидан 3 машина шағал келтирилди. Мутасаддилар саъй-ҳаракати билан кўчани созлаш ва текислаш мақсадида техник воситалар жалб этилди. Ишчи кучи бириктирилди.
— Мана, қўлимга Бухоро шаҳар ҳокимлиги ободонлаштириш бошқармаси бошлиғи Ахтам Аҳмедов ҳамда Бухоро шаҳар ҳокими Карим Камоловнинг 2017 йилнинг июль ойида ваъдалар билан тўлдирилган хати турибди. Бир неча йилдан буён кўчамизни манзилли дастурга киритилган, деб келишади. Аслида, бундай эмас экан, — деди фуқаро Мухтор Ғафуров. — Мурожаатимиз учун шағал етказилибдимиш. Ахир бу қандай ҳолат? Аввал сув қочириш йўлларини таъмирлаш, сувоқава қувурларини созлаш зарур. Ҳозир шағал ётқизилади. Аммо асосий муаммо шағал остида қолиб кетаверади. Хўжакўрсинга иш ярамайди.
Аҳолининг билдиришича, автомобиллар қатнови ҳам йўлнинг чўкишига сабаб бўлиб келмоқда. Ерости бўш ва носоз. Ёғингарчилик кунлари кўчадан транспорт воситаларининг ҳам, пиёдаларнинг ҳам қатнови оғир.
— Шу пайтгача шағални ўз маблағимиз эвазига олганмиз. Ҳарқалай, бу гал ҳудуд секторига қилган мурожаатимиз эътиборсиз қолдирилмади. Ёғин-сочинли кунлардан омон-эсон ўтиб олсайдик тезроқ, — деди Сожида Тиллаева.
Мухтор Ашрафий номидаги 16-сонли маҳалла фуқаролар йиғини раиси Очил Мажидовнинг ўзи ҳам жуда кўп идора, ташкилотларга мурожаат этгани, ушбу юзасидан Бухоро шаҳар ҳокимининг бир неча маротаба келгани, айни пайтда шаҳар бўйича мавжуд барча ички ва ташқи йўлларни асфальтлаш ва созлаш бўйича ишлар амалга оширилаётгани, хусусан, Дарвозаи ўғлон кўчаси ҳам назоратда эканлигини таъкидлаганини билдирди.
11 апрель куни тўкилган шағаллар 12 апрель куни текисланди. «Йиллар давомида бизни қийнаб келаётган масала кечагина қилинган мурожаат билан ечим топди. Бу ишга бош-қош бўлган мутасадди раҳбарларга, «Дарё» таҳририятига миннатдорлик билдирамиз. Бошқа масалалар ҳам босқичма-босқич ҳал этилиб, кўчамиз ободлиги янаям таъминланишига ишонамиз», — деди фуқаро Ашур Шеров.
16 та кўча мавжуд маҳаллада болалар ўйингоҳи йўқ
Мухтор Ашрафий маҳалласида 16 та кўча мавжуд. Шундан Чорбакр кўчаси, Зебунисо, Уста Роҳил, Дарвозаи ўғлон, Писта Широн, Чашмаю Аюб кўчалари, яъни 6 кўча, 7 муюлиш таъмир ва асфальтлашга муҳтож. 2893 нафар аҳоли, 503 та хонадон, 531 та оила бор. Бироқ маҳаллада болалар ўйингоҳлари йўқ. Болалар ўз дарвозалар тагида ёки тор, аммо серқатнов кўча четларида ўйнайди. Болалар хавфсизлигини таъминлаш учун имконият яратилмаган. Чунки, бўш жойнинг ўзи йўқ. Қаттиқ ёғингарчилик кунларида эса Дарвозаи ўғлоннинг аксарият болалари мактабга қатнамайди.
Маҳалладаги Чорбакр ва Чашмаю Аюб кўчалари аҳволи ҳам эътиборни тортмай қўймайди. Хусусан, Чашмаю Аюб кўчасида анчадан буён ҳеч қандай ободонлаштириш ишлари олиб борилмагани шундоқ кўриниб турибди. Бундан олти ой илгари ерости сув қувурларини таъмирлаш ишлари амалга оширилгандан кейин иш охирига етказилмаган. Ағдар-тўнтар ҳолатда ташлаб кетилган. Бу ачинарли манзарани бартараф этиш ҳақида ҳам ҳеч ким бош қотиришни истамаган кўринади. Йўл четидаги ағдар-тўнтар қисми чиқиндилар уюмига тўлган.
— Вазирлар Маҳкамасининг 2017 йил 24 апрелдаги 05/1-299-сонли «Бухоро вилояти ички хўжалик йўлларини, шаҳар кўчалари, туман марказлари, шаҳар посёлкалари ва қишлоқ аҳоли пунктлари автомобиль йўлларини хатловдан ўтказиш» тўғрисида тасдиқланган қарор ижроси юзасидан жори йилда Бухоро шаҳридаги барча кўчалар, посёлка ва маҳалла фуқаролар йиғинлари ҳудудларидаги автомобиль ички йўллари қайта хатловдан ўтказилиб, барча носоз ва таъмирталаб кўчалардаги муаммолар босқичма-босқич тўлиқ бартараф этилади, — деди Бухоро шаҳар ҳокимлиги аппарати етакчи мутахассиси Ойбек Дўстов.
Бухоро шаҳри мутасаддилари ва йўл таъмири масъулларининг бу борада амалий ишларни бажарсалар, ажаб эмас.
Изоҳ (0)