Шавкат Мирзиёев Уммон, Қирғизистон, Туркия, Индонезия ва Қозоғистоннинг Ўзбекистондаги Фавқулодда ва мухтор элчилари этиб тайинланган Аҳмад бин Саид ал-Касирий, Ибрагим Жунусов, Меҳмет Сурейя Эр, Сунарио Картадината ҳамда Дархан Сатибалдидан ишонч ёрлиқларини қабул қилди. Бу ҳақда Президент матбуот хизмати маълум қилди.
Давлат раҳбари элчиларни самимий табриклаб, уларга масъулиятли дипломатик миссияни бажаришда муваффақиятлар тилади.
Президент ишонч ёрлиқларини топшириш маросимидаги нутқида янги элчилар вакиллик қилаётган давлатлар билан кўп қиррали ҳамкорликнинг муҳим йўналишларига тўхталиб ўтди.
Давлат раҳбари янги тайинланган элчилар профессионал ва ҳаётий тажрибаси, бой билими билан мамлакатлар ўртасидаги дўстона муносабатлар ва ўзаро манфаатли ҳамкорликни мустаҳкамлашга қаратилган дипломатик фаолиятини муваффақиятли амалга оширишига умид билдирди.
Ўз навбатида, элчилар самимий қабул учун давлат раҳбарига миннатдорлик билдириб, Ўзбекистон билан кенг кўламли ҳамкорлик ва самарали шерикликни янада ривожлантиришга бор куч-ғайратини сафарбар қилишини қайд этди.
Изоҳ (0)