Шавкат Мирзиёев жорий йилнинг январь ойида Жиззах вилоятига ташрифи чоғида вилоятдаги барча туман ва шаҳарлар марказларини обод ва кўркам, аҳоли учун барча шарт-шароит ва имкониятлар яратилган ҳудудларга айлантириш вазифасини қўйган.
«Халқ билан мулоқот» гуруҳининг маълум қилишича, ўтган икки ойдан ортиқ вақт давомида бу борада амалий ишларга фаол киришилиб, вилоят маркази Жиззах шаҳридан бошлаб, туманлар марказлари ҳамда чекка ҳудудларни ҳам қамраб олди.
Хусусан, Зарбдор туманида туман марказининг замонавий шаҳарсозлик ва архитектура талабларига жавоб берадиган бош лойиҳаси ишлаб чиқилган.
Бунда янги уй-жойлар барпо этиш, мавжудларини таъмирлаш, бугунги тараққиёт даражасига монанд ижтимоий соҳа объектлари, йўллар ва пиёдалар йўлаклари, аҳолига хизмат кўрсатиш ва дам олиш масканлари тармоқларини юзага келтириш, ичимлик суви таъминотини яхшилаш билан боғлиқ катта ҳажмдаги қурилиш-таъмирлаш ишларига киришилган.
«Мустақиллик», «Тинчлик» ва «Ойбек» маҳаллаларидаги 50 дан зиёд кўпқаватли уйлар томи ва фасади янгиланиб, дераза ромлар алмаштириляпти. Уйларга кириш йўлакларини бетонлаш, янги эшиклар ўрнатиш ишлари бажарилмоқда, намунавий лойиҳалар бўйича тандир ва ўчоқхоналар, болалар майдончалари барпо этилмоқда.
Давлат-хусусий шериклик тамойили асосида тўртта та мактабгача таълим муассасаси барпо этилади, тиббиёт бирлашмаси, 1-сонли болалар боғчаси каби бир қатор ижтимоий муассасалар бинолари янгиланади.
Шунингдек, Эски Бўстон аҳоли масканида 500 иш ўрнига эга бўладиган тикувчилик корхонаси қурилиши олиб бориляпти. Мазкур корхонада асосан шу ерда яшовчи, ижтимоий муҳофазага муҳтож фуқаролар иш билан банд бўлади. Тумандаги хотин-қизлар ўртасида ишсизлик даражаси энг юқори бўлган «Шарқ юлдузи», «Тараққиёт», «Янгикент», «Оқар» қишлоқларида Мирзачўл тажрибаси асосида 250 иш ўрнига эга бўлган тўртта тикувчилик цехи ташкил этилади.
«Лайлакуя» қишлоғида яна бир йирик корхона «Зомин махсус плита» заводи қурилмоқда. Испания билан ҳамкорликда ташкил этилаётган мазкур саноат объектида уй-жой қурилиши учун темир-бетон маҳсулотлари тайёрланади. 12 миллион АҚШ доллари қийматидаги лойиҳа доирасида Испания ва Италиядан келтирилган энг замонавий технологик линиялар ишга туширилади.
Тартибсиз, эски, сувоғи кўчган 79 та уй кўча бўйини тўлдириб турган Қорасоч Отақулова кўчасида ҳам бунёдкорлик ишлари бошланган. Ихчам, замонавий 92 та уй шу йилнинг ўзида қуриб битказилади, бундан ташқари замонавий бозор, 50 ўринли меҳмонхона, минимаркет, маиший хизмат кўрсатиш шохобчалари ҳамда тикувчилик мажмуаси ишга туширилади.
Изоҳ (0)