Shavkat Mirziyoyev joriy yilning yanvar oyida Jizzax viloyatiga tashrifi chog‘ida viloyatdagi barcha tuman va shaharlar markazlarini obod va ko‘rkam, aholi uchun barcha shart-sharoit va imkoniyatlar yaratilgan hududlarga aylantirish vazifasini qo‘ygan.
“Xalq bilan muloqot” guruhining ma‘lum qilishicha, o‘tgan ikki oydan ortiq vaqt davomida bu borada amaliy ishlarga faol kirishilib, viloyat markazi Jizzax shahridan boshlab, tumanlar markazlari hamda chekka hududlarni ham qamrab oldi.
Xususan, Zarbdor tumanida tuman markazining zamonaviy shaharsozlik va arxitektura talablariga javob beradigan bosh loyihasi ishlab chiqilgan.
Bunda yangi uy-joylar barpo etish, mavjudlarini ta’mirlash, bugungi taraqqiyot darajasiga monand ijtimoiy soha obyektlari, yo‘llar va piyodalar yo‘laklari, aholiga xizmat ko‘rsatish va dam olish maskanlari tarmoqlarini yuzaga keltirish, ichimlik suvi ta’minotini yaxshilash bilan bog‘liq katta hajmdagi qurilish-ta’mirlash ishlariga kirishilgan.
“Mustaqillik”, “Tinchlik” va “Oybek” mahallalaridagi 50 dan ziyod ko‘pqavatli uylar tomi va fasadi yangilanib, deraza romlar almashtirilyapti. Uylarga kirish yo‘laklarini betonlash, yangi eshiklar o‘rnatish ishlari bajarilmoqda, namunaviy loyihalar bo‘yicha tandir va o‘choqxonalar, bolalar maydonchalari barpo etilmoqda.
Davlat-xususiy sheriklik tamoyili asosida to‘rtta ta maktabgacha ta’lim muassasasi barpo etiladi, tibbiyot birlashmasi, 1-sonli bolalar bog‘chasi kabi bir qator ijtimoiy muassasalar binolari yangilanadi.
Shuningdek, Eski Bo‘ston aholi maskanida 500 ish o‘rniga ega bo‘ladigan tikuvchilik korxonasi qurilishi olib borilyapti. Mazkur korxonada asosan shu yerda yashovchi, ijtimoiy muhofazaga muhtoj fuqarolar ish bilan band bo‘ladi. Tumandagi xotin-qizlar o‘rtasida ishsizlik darajasi eng yuqori bo‘lgan “Sharq yulduzi”, “Taraqqiyot”, “Yangikent”, “Oqar” qishloqlarida Mirzacho‘l tajribasi asosida 250 ish o‘rniga ega bo‘lgan to‘rtta tikuvchilik sexi tashkil etiladi.
“Laylakuya” qishlog‘ida yana bir yirik korxona “Zomin maxsus plita” zavodi qurilmoqda. Ispaniya bilan hamkorlikda tashkil etilayotgan mazkur sanoat obyektida uy-joy qurilishi uchun temir-beton mahsulotlari tayyorlanadi. 12 million AQSh dollari qiymatidagi loyiha doirasida Ispaniya va Italiyadan keltirilgan eng zamonaviy texnologik liniyalar ishga tushiriladi.
Tartibsiz, eski, suvog‘i ko‘chgan 79 ta uy ko‘cha bo‘yini to‘ldirib turgan Qorasoch Otaqulova ko‘chasida ham bunyodkorlik ishlari boshlangan. Ixcham, zamonaviy 92 ta uy shu yilning o‘zida qurib bitkaziladi, bundan tashqari zamonaviy bozor, 50 o‘rinli mehmonxona, minimarket, maishiy xizmat ko‘rsatish shoxobchalari hamda tikuvchilik majmuasi ishga tushiriladi.
Izoh (0)