Судан Мудофаа вазири Аҳмад Авад ибн Ауф Судан президенти Умар ал-Баширнинг ҳокимиятдан четлатилганини эълон қилди. Бу ҳақда TJournal хабар берди.
Мудофаа вазирининг сўзларига кўра, ал-Башир хавфсиз жойда ҳибсда сақланмоқда. Унинг вазифаларини эса ҳарбий кенгаш бажаради. Шунингдек, ҳарбий кенгаш икки йил давомида ҳокимият тепасида бўлади.
Аҳмад Авад ибн Ауф, шунингдек, мамлакатда уч ойлик фавқулодда ҳолат эълон қилиб, 24 соатга ҳаво майдонини ёпиб қўйган.
ОАВнинг хабарига кўра, 11 апрель куни Суданда ҳарбий тўнтариш юз берган. Натижада ал-Башир ҳокимиятдан чекинган. Ливаннинг Al-Mayadeen нашри президентни ҳибсга олингани ҳақида ёзган эди. Ўша пайтдаёқ Судан ҳарбий кенгаши мамлакатнинг биринчи вице-президенти, Мудофаа вазири Аҳмад Авад ибн Ауф бошчилигида бир йил муддага ҳокимиятни қўлга олиши аниқ бўлган эди.
Суданда 2018 йил декабрдан бери халқ норозилиги давом этиб келмоқда. Аҳоли ёқилғи, нон ва уннинг нархидан ҳамда асосий озиқ-овқат маҳсулотларининг танқислигидан норози.
Изоҳ (0)