Миллий кино маҳсулотларини ишлаб чиқариш учун 2018 йилда давлат бюджетидан жами 33,6 миллиард сўм маблағ ажратилди. Бу маблағ 2017 йилга нисбатан 2,7 баробар кўп бўлиб, 2019 йилда бу нисбат янада кўпайиши режалаштирилмоқда. Бу ҳақда пойтахтдаги Миллий матбуот марказида ташкил этилган матбуот анжуманида маълум қилинди, деб хабар берди ЎзА.
Анжуманда «Ўзбеккино» миллий агентлиги ходимлари, киноижодкорлар, таниқли кинорежиссёрлар, киношунослар, давлат ва хусусий киностудиялар вакиллари иштирок этди.
Мутахассислар бадиий, ҳужжатли ва мультипликацион фильмларнинг савиясини ошириш ҳамда сифат жиҳатидан янги даражага кўтаришни муҳокама қилди.
Таъкидланишича, ўзбек киноси ривожланишнинг янги палласига кириб, замон билан ҳамнафас илгарилаб бориши учун қатор ишлар амалга оширилди. Жумладан, президентнинг 2017 йил 7 августдаги «Миллий кинематографияни янада ривожлантириш чора-тадбирлари тўғрисида»ги ҳамда 2018 йил 24 июлдаги «Миллий киноиндустрияни ривожлантириш бўйича қўшимча чора-тадбирлар тўғрисида»ги қарори ижроси юзасидан мамлакатда кино саноатини ривожлантириш соҳасида амалга оширилаётган ишлар муайян ижобий натижаларга эришиш имконини берди.
Бадиий кенгаш йиғилишида 39 та бадиий фильм, 48 та ҳужжатли фильм, 19 та мультипликацион фильм, 14 та қисқа метражли фильм кинолойиҳалари ўқиб-ўрганиб муҳокама этилди. Шулардан, 27 та бадиий фильм, 46 та ҳужжатли фильм, 10 та қисқа метражли фильм кинолойиҳалари ижобий баҳоланиб, ишлаб чиқаришга туширилди. 19 та бадиий фильм, 40 та ҳужжатли фильм, 8 та мультфильм, 2 та қисқа метражли фильм тайёрланиб, Бадиий кенгаш эътиборига ҳавола этилди. Ўтган давр ичида «Зумраша» болалар юмористик киножурналининг 11 та тўплами тайёрланди.
Ижтимоий ҳаётнинг барча соҳаларида амалга оширилаётган янгиланишлар, шунингдек, аҳолининг реал эҳтиёжидан келиб чиққан ҳолда давлат маблағлари асосида миллий фильмлар ишлаб чиқариш сифат кўрсаткичларини ҳам яхшилашга ҳаракат қилинмоқда.
Ўтган қисқа давр мобайнида ХХ аср бошида яшаб ўтган хоразмлик ислоҳотчи вазир ҳақида «Исломхўжа», буюк муҳаддис ҳақида «Абу Исо Муҳаммад Термизий», мўғул босқинига қарши курашган аждодлар ҳақида «Элпарвар», буюк ёзувчи Саид Аҳмаднинг қисмати ҳақида «Саид билан Саида», ўзбек халқининг Иккинчи жаҳон урушида кўрсатган қаҳрамонлиги ҳақида «Берлин – Оққўрғон» каби тарихий мавзудаги бадиий фильмлар томошабинларга тақдим қилинди.
«Жалолиддин Мангуберди», «Исхоқхон Ибрат», «Ҳамид Олимжон ва Зулфия», «Умархон ва Нодирабегим», «Абдулла Авлоний» ҳақидаги фильмларни тасвирга олиш ишлари жадал давом этмоқда.
Изоҳ (0)