Хитойда ўрмон ёнғини оқибатида 30 киши ҳалок бўлди

2 апрель куни Хитой жануби-ғарбидаги Сичуань провинциясининг Мули-Тибет автоном ҳудудида ўрмон ёнғини содир бўлди. Бу ҳақда «ТАСС» хабар берди.

Ёнғин содир бўлган ҳудуднинг умумий майдони 15 гектарни ташкил этган. Айни пайтда ёнғин деярли бутунлай ўчирилган. Аммо ёнғиннинг яширин манбалари ҳали ҳам сақланиб қолган, тутун чиқишда давом этмоқда.

Хабарда айтилишича, ёнғин ҳудудига 700 кишидан иборат ўт ўчириш гуруҳи етиб келган. Уларга яна учта вертолёт ва бошқа техникалар қўшилган.

Таъкидланишича, ҳудудга келишнинг қийинлиги сабабли ёнғинни бутунлай бартараф этиш учун қўшимча вақт талаб этилади.

Ҳодиса 30 март куни, маҳаллий вақт билан тахминан соат 18:00 да бошланган. Ёнғин ўчоғи тахминан тўрт метро баландликдаги узоқдаги тоғ чўққисида жойлашган. 31 март куни шамол йўналиши кескин ўзгариши оқибатида ёнғин янада кучли ёнишни бошлаган. Ўнлаб ўт ўчирувчилар оловдан қочиш учун жарликдан сакрашга мажбур бўлган.

Ҳозирда қурбонлар сони 30 нафарга етгани тасдиқланган. Уларнинг 27 нафари ўт ўчириш ходимлари ва учтаси уларга ёрдам берган маҳаллий аҳоли бўлган.