Ўзбекистон 2018 йилда хориждан 0,7 миллион АҚШ долларига қурол-яроғ, ўқ-дори ва уларнинг қисмлари ҳамда тегишли воситаларини харид қилди. Ундан олдинги йилларда эса бу мақсад учун 0,3 миллион доллардан сарфланган. Бу ҳақда Марказий банк ҳисоботида маълум қилинди.
Шунингдек, 2018 йилда мамлакат 0,1 миллион долларлик санъат асарлари ва антиқа буюмларни импорт қилган. 2016 ва 2017 йилларда четдан ушбу йўналиш бўйича ҳеч нарса харид қилинмаган.
Қимматбаҳо бўлмаган металлар ва улардан тайёрланган буюмлар импортига ҳам кўпроқ маблағ сарфланган. Бу борада 2016 йилда 1,2 миллиард доллар, 2017 йилда 1,7 миллиард доллар, 2018 йилда эса 2,4 миллиард доллар харж қилинган.
Қимматбаҳо металлар ва тошлар импортида ҳам кескин ўсиш кузатилган. 2016 йилда бунинг учун 0,4 миллион доллар сарф этилган бўлса, 2018 йилга келиб мазкур кўрсаткич 40,7 миллион долларга етган.
Изоҳ (0)