Навоий вилояти Нурота тумани ҳокими Умарбек Халилов ташаббуси билан #bookchallenge акцияси доирасида ҳамда соҳибқирон Амир Темур таваллудининг 683 йиллиги муносабати билан тумандаги барча умумтаълим мактабларига 600 дона «Темур тузуклари» китоби совға қилинди.
Бундан ташқари, Олий Мажлис Қонунчилик палатаси депутати Иброҳим Хождиев Наманган шаҳридаги 1-сон ихтисослаштирилган давлат умумтаълим мактаб интернатининг кутубхонаси учун 100 га яқин ижтимоий-сиёсий ва бадиий адабиётлар ҳамда спорт анжомлари совға қилинди.
Самарқанд вилояти ҳокими Эркинжон Турдимов Қўшработ туманига бориб, ўзи ўқиган таълим муассасалари – 64, 41 ва 19-умумий ўрта таълим мактабларининг ҳар бирига 200 тага яқин китобларни туҳфа қилди.
#bookchallenge акцияси доирасида Самарқанд шаҳар ҳокими Фурқат Раҳимов ўзи таҳсил олган 13-мактабга 70 дан ортиқ турли бадиий, тарихий ва маънавий китоблар топширди.
Шунингдек, Самарқанд вилояти ҳокимининг ўринбосари, хотин-қизлар қўмитаси раиси Гавҳар Алимова ҳам ўзи таҳсил олган Жомбой туманидаги 16-умумтаълим мактаби 50 дан ортиқ китоб совға қилди. Самарқанд шаҳар молия бўлими бошлиғи Икром Ахтамов ҳам ўзи таҳсил олган 28-мактаб кутубхонасига 50 тадан зиёд китобларни тақдим этган.
19 март куни Мажбурий ижро бюросининг марказий аппарати ходимлари ўзлари таълим олган мактабларга ташриф буюриб 20 донадан қизиқарли адабиёт ва дарсликларни тақдим этишди. А.Бабаяров Чиноз туманида таҳсил олган мактабига, Миробод туман бўлими ходимлари ўзларининг мактабларига 300 дан ортиқ китоблар ҳадя қилди.
Шунингдек. Ўзбекистон Олий суди раиси Қозимжон Комилов ўзи ўқиган Тошкент шаҳри Шайҳонтохур туманидаги 136-мактабга 100 дан ортиқ китоб совға қилди.
Мудофаа вазирининг биринчи ўринбосари — Қуролли Кучлари Бош штаби бошлиғи генерал-майор Павел Эргашев ҳам #bookchallenge акцияси доирасида Мирзо Улуғбек номидаги ихтисослаштирилган 171-сонли мактабга ўзининг шахсий кутубхонасидан ўрин олган китобларни ҳадя этди.
Олмалиқ кон-металлургия комбинати бошқаруви раиси Абдулла Хурсанов 29 март куни Олмалиқ шаҳридаги 80-сонли мактаб-интернат ўқувчиларига 50 та энг сара бадиий адабиётлар, ўқув қўлланмалари ҳамда инглиз тилини ўрганувчилар учун қатор луғат ва адабиётлар совға қилди.
Шунингдек, 29-округ ЎзЛиДеП партияси депутати Илёсхон Азизов Парвона маҳалла фуқаролар йиғини кутубхонасига машхур ўзбек, рус ва қирғиз ёзувчилари бадиий адабиётлари тўпламини совға қилди.
Эслатиб ўтамиз мамлакат бўйлаб ўтказилаётган #bookchallenge акцияси давомида барча даражадаги раҳбарлар мактабларга китоблар совға қилмоқда.
Изоҳ (0)